Косонсой туманининг «Навбаҳор» маҳалласидаги оқова сув каналига ёритиш тизими ва маиший техника воситаларини ишлатиш учун мўлжалланган микроГЭСнинг тажриба нусхаси ўрнатилди. Бу ҳақда «Халқ сўзи» хабар бермоқда.
Агрегат синовдан муваффақиятли ўтди. Тадқиқотчилар қурилмани ясашда асосан маҳаллий материаллардан фойдаланди, фақат генератор четдан олиб келинди. Секин оқувчи сув манбасида ишлайдиган чархпалакли қурилма чиқараётган электр токи ёрдамида аҳоли хонадонлари, фермер хўжалиги ва тадбиркорлик субъектларини бемалол таъминласа бўлади.
— Қурилма баҳоси унча қиммат эмас, — дейди Наманган муҳандислик технология институти ўқитувчиси, «Электр энергиясининг сифат кўрсаткичлари юқори бўлган қуввати 10-15 киловаттли микроГЭС қурилмасини яратиш ва амалиётга жорий этиш» лойиҳаси менежери Зулфия Мамадалиева. — Уни ясаш ва ўрнатиш харажатлари билан қўшиб ҳисоблаганда 25-30 миллион сўмдан ошмайди. Икки йилда ўзини қоплайди, ўн йил давомида ишлатиш кафолоти бор. Янгилигимизга кўпчилик қизиқиш билдиряпти. Хусусан, бир қатор тадбиркорлик субъектлари муқобил энергия воситаси тайёрлаш учун буюртма берган.
Зулфия Мамадалиева яқинда Тошкент шаҳрида ўтказилган «Ўзбекистон аёлларининг 100 та энг яхши инновацион лойиҳаси» республика танловида иштирок этиб, «Энг самарали инновацион лойиҳа» номинацияси бўйича ғолибликни қўлга киритди. «Наманган вилоятида муқобил энергия технологияларининг ўқув ва ишлаб чиқариш марказини яратиш» мавзуидаги ушбу лойиҳада аҳоли ва тадбиркорлик субъектларининг кундалик фаолиятида муқобил энергия манбааларини жорий қилиш ва кўникмаларини ўргатиш, янгилик ихлосмандларига амалий кўмак бериш вазифалари кўзда тутилган.
Изоҳ (0)