Kosonsoy tumanining “Navbahor” mahallasidagi oqova suv kanaliga yoritish tizimi va maishiy texnika vositalarini ishlatish uchun mo‘ljallangan mikroGESning tajriba nusxasi o‘rnatildi. Bu haqda “Xalq so‘zi” xabar bermoqda.
Agregat sinovdan muvaffaqiyatli o‘tdi. Tadqiqotchilar qurilmani yasashda asosan mahalliy materiallardan foydalandi, faqat generator chetdan olib kelindi. Sekin oquvchi suv manbasida ishlaydigan charxpalakli qurilma chiqarayotgan elektr toki yordamida aholi xonadonlari, fermer xo‘jaligi va tadbirkorlik subyektlarini bemalol ta’minlasa bo‘ladi.
— Qurilma bahosi uncha qimmat emas, — deydi Namangan muhandislik texnologiya instituti o‘qituvchisi, “Elektr energiyasining sifat ko‘rsatkichlari yuqori bo‘lgan quvvati 10-15 kilovattli mikroGES qurilmasini yaratish va amaliyotga joriy etish” loyihasi menejeri Zulfiya Mamadaliyeva. — Uni yasash va o‘rnatish xarajatlari bilan qo‘shib hisoblaganda 25-30 million so‘mdan oshmaydi. Ikki yilda o‘zini qoplaydi, o‘n yil davomida ishlatish kafoloti bor. Yangiligimizga ko‘pchilik qiziqish bildiryapti. Xususan, bir qator tadbirkorlik subyektlari muqobil energiya vositasi tayyorlash uchun buyurtma bergan.
Zulfiya Mamadaliyeva yaqinda Toshkent shahrida o‘tkazilgan “O‘zbekiston ayollarining 100 ta eng yaxshi innovatsion loyihasi” respublika tanlovida ishtirok etib, “Eng samarali innovatsion loyiha” nominatsiyasi bo‘yicha g‘oliblikni qo‘lga kiritdi. “Namangan viloyatida muqobil energiya texnologiyalarining o‘quv va ishlab chiqarish markazini yaratish” mavzuidagi ushbu loyihada aholi va tadbirkorlik subyektlarining kundalik faoliyatida muqobil energiya manbaalarini joriy qilish va ko‘nikmalarini o‘rgatish, yangilik ixlosmandlariga amaliy ko‘mak berish vazifalari ko‘zda tutilgan.
Izoh (0)