Жорий йилнинг 27 февраль куни республиканинг айрим ҳудудларида хусусан, Бухоро, Самарқанд, Навоий, Тошкент вилоятлари ҳамда Тошкент шаҳрида кучли шамол ва ёмғир кузатилди, деб хабар беради ФВВ матбуот хизмати.
«Айниқса Тошкент шаҳрида шамолнинг тезлиги секундига 16 метргача, Тошкент вилоятида эса секундига 15 метргача етди. Бунинг натижасида Олмазор туманида йўлнинг қатнов қисмига дарахт ағдарилиб тушиб, туман ободонлаштириш бошқармасининг ёрдами билан қисқа вақтда табиий офатнинг оқибатлари бартараф қилинди», — дейилади хабарда.
Самарқанд вилоятининг Ургут, Каттақўрғон, Самарқанд туманларида, Тошкент вилоятининг Бўстонлиқ, Тошкент ва Янгийўл туманларида ва Тошкент шаҳрида шиддатли ёмғир ёғиб ўтди. Натижада Тошкент шаҳрининг айрим туманларида турар жой биноларининг алоҳида қисмларига сув кириши кузатилган. Ободонлаштириш бошқармаси ва ФВБнинг зарур куч ва воситалар ёрдамида ёмғир оқибатлари қисқа муддатда бартараф этилди.
Самарқанд вилоятининг Ургут, Каттақўрғон, Самарқанд туманлари тоғли ҳудудларига сел келди. Вилоят ФВБ ходимлари, ИИБ ҳамда маҳаллий ҳокимият органлари билан ҳамкорликда жойларда профилактик чоралар кўрилди. Жароҳат олганлар ёки жабрланганлар ҳақида маълумотлар келиб тушмади.
Қайд этилишича, Самарқанд вилоятининг тоғли ҳудудларида бир суткадаги ёғингарчилик, ойлик ёғингарчилик миқдорининг 67 фоизини ташкил этди.
Изоҳ (0)