Флорида губернатори Рик Скотт Паркленд шаҳридаги мактабда содир бўлган отишмадан сўнг, штат қонун чиқарувчиларини ўсмирлар ва руҳий касаллиги бўлган одамларга қурол сотиш қонунини кучайтиришга чақирди. Бу ҳақда Reuters агентлигига таяниб, «Газета.ru» хабар берди.
Скоттнинг маълум қилишича, у қонун чиқарувчи органларидан қурол сотиб олиш мумкин бўлган ёшни 18 дан 21 ёшга қадар узайтиришни талаб қилади. Мазкур қоида армия ёки ҳуқуқ-тартибот органларида хизмат қиладиган ёш йигитларга нисбатан истисно тарзида қўлланилади. Шунингдек, губернатор руҳий касалликдан азият чекувчиларга ҳам қурол сотиш тартибини кучайтиришни таклиф қилди.
Бундан олдинроқ АҚШ президенти Дональд Трамп ҳам 21 ёшга тўлмаган шахсларга қурол сотмасликни, шунингдек, ўқитувчиларни қурол билан таъминлаш лозимлиги борасида ўз фикрларини баён этганди.
Эслатиб ўтамиз, Паркленд шаҳридаги (Флорида штати) Marjory Stoneman Douglas мактабида 19 ёшли Николас Круз томонидан амалга оширилган отишма оқибатида 17 киши ҳалок бўлганди.
Изоҳ (0)