22 февраль куни Тошкент вилояти ҳудудидаги темир йўл кесишмаларида поездларнинг хавфсиз ҳаракатланишини таъминлаш мақсадида «Диққат темир йўл» профилактика куни ўтказилди, деб хабар беради вилоят ИИБ матбуот хизмати.
Шунингдек, вилоят ички ишлар бошқармаси ходимлари корхона, ташкилот, ўқув муассасалари ва маҳаллаларда профилактик учрашувлар ўтказди. Жумладан, мактабларда ўқувчилар томонидан дарсдан сўнг уйларига қайтишларида темир йўл излари орқали ҳаракатланмасликлари, темир йўл изи яқини уй ҳайвонларини боқмасликлари ва темир йўл изларига ҳар хил қаттиқ жисмларни қўймасликлари ҳамда поезд ойналарига тош отмасликлари ҳолатлари ҳақида етказилиб, бундай салбий ҳолатлар нималарга олиб келиши ҳақида тушунчалар берилди. Бундан кўзланган асосий мақсад пиёда ҳаракат иштирокчилари ва ҳайдовчилар хавфсизлиги таъминлашдир, дейилади хабарда.
Ўтказилган «Диққат темир йўл» профилактика кунида 32 та темир йўл кесишмасига 64 нафар ЙПХ ходими бириктирилди. Улар томонидан кесишмаларда поездларни ўтиш вақтида ҳаракат хавфсизлиги таъминлаб турилди. Шунингдек, темир йўл кесишмасидан ўтиш қоидасини бузган 70 нафар ҳайдовчига нисбатан маъмурий баённома расмийлаштирилди.
Изоҳ (0)