«Туркистон» саройида Ўзбекистон Хотин-қизлар қўмитаси томонидан ташкил этилган «Ўзбекистон аёлларининг 100 та энг яхши инновацион лойиҳаси» биринчи республика танлови ғолибларини тақдирлашга бағишланган тадбир бўлиб ўтди. Бу ҳақда ЎзА хабар бермоқда.
«Ўзбекистон аёлларининг 100 та энг яхши инновацион лойиҳаси» танловида ўз техник лойиҳалари, рационализаторлик таклифлари, инновацион ишланмаларини амалиётга жорий этиш истагида бўлган олималар, докторантлар, истеъдодли талаба ва ўқувчи қизлар, ихтирочилар, рационализатор, муҳандис, конструктор, дастурчи, шифокор, тадбиркор аёлларнинг изланишлари атрофлича ўрганилди.
Пойтахтдаги Турин политехника университетида шу йил 6—7 февралда бўлиб ўтган тадбирда уларнинг иши билан атрофлича танишиш, янгиликларнинг ўзига хослиги, афзаллигига оид илмий тақдимотларда қатнашиш имконияти яратилди. Ишланмалар тиббиёт, таълим, илғор технологиялар, тадбиркорлик, қишлоқ хўжалиги, ахборот технологиялари ва бошқа кўплаб соҳаларни қамраб олган.
Республика экспертлар кенгаши томонидан ишланмаларнинг янгилиги, мазмун-моҳияти, иқтисодий, маънавий-маърифий самараси, аҳамияти каби жиҳатларга асосий эътибор қаратилди. Энг яхши лойиҳа ва ғоялар муаллифларига диплом ва эсдалик совғалари топширилди.
Изоҳ (0)