Алишер Навоий, Олмазор, Ислом Каримов ва Фурқат кўчалари оралиғида бунёд этилаётган Tashkent City халқаро ишбилармонлик марказининг тақдимоти бўлиб ўтди, деб хабар берди «Новости Узбекистана».
Мазкур комплекс 80 гектар майдонни эгаллайди. Қурилиш ишлари Германиянинг Dress & Sommer халқаро консалтинг компанияси билан ҳамкорликда олиб борилади.
Tashkent City ҳудудининг 395 000 квадрат метрини турар жой бинолари, 281 000 квадрат метрини — офислар, 349 000 — савдо нуқталари, 64 000 квадрат метрини эса меҳмонхоналар эгаллайди. Анжуманлар зали ва кўргазма биноларига 36 000 квадрат метр, таълим муассасаларига 9 000 квадрат метр ажратилади. 33 минг квадрат метрда дам олиш зоналари барпо этилади.
Tashkent City лойиҳасига кўра унда жойлашадиган бинолар:
— Ер ости автотураргоҳларига эга тўққизта «А» классига оид турар жой биноси;
— Болалар боғчаси, халқаро мактаб ва соғломлаштириш марказига эга «А» синфига оид бешта турар жой биноси;
— Ичидан офислар, квартиралар, меҳмонхона ва гипермаркетлар ўрин оладиган 40 қаватли бинолар;
— Шунингдек, офислар, меҳмонхона апартаменти ва турар жой квартиралари учун мўлжалланган яна бир 40 қаватли бино;
— Беш юлдузли меҳмонхона, конгресс-холл ва кўргазма маркази;
— Молиявий марказ;
— Савдо марказлари, мини-меҳмонхоналар ва офислар ўрин олган 11 та 4 қаватли бино.
Шунингдек, пиёдалар зонаси жойлашган марказда савдо марказлари ва кўнгилочар муассасалар ўрин олади.
Умуман олганда Tashkent City ўзининг экологиклиги ва замонавийлиги билан барчани ҳайрон қолдирадиган бўлади. Бироқ лойиҳа суратларига қараганда, бу ердаги яшил манзараларнинг аксариятини газонлар ва паст бўйли дарахтлар ташкил этади. Йўлларнинг асосий қисми қуёш нуридан ҳимоя қилинмайди, бу эса ёз фасли иссиқ келадиган Тошкент учун фойда эмас, албатта.
Изоҳ (0)