Ҳарбий фанлари доктори, Россия ракета ва артиллерия фанлар академиясининг мухбир аъзоси, биринчи ранг капитани Константин Сивков инсониятни космосдан келадиган ҳужумларга қарши тайёргарлик кўришга чақирди. Экспертнинг мақоласи «ВПК»да эълон қилинди.
Сивковнинг ҳисоблашича, ерликлар астероидларга қарши қуролни яратишга киришиши керак. Унинг фикрича, сайёрага йирик астероиднинг қулаши бутун инсоният учун хавф туғдиради: «Инсониятнинг биологик тур сифатида йўқолиб кетишидан олдида бизнинг барча геосиёсий, хусусан, майда қарама-қарши ҳаракатларимиз ёш болаларнинг ўйинчоқ учун талашишига ўхшайди».
Эксперт астероидларни йўқ қилиш учун уларга термоядроли каллакча ўрнатилган ракеталарни йўналтириш керак демоқда. Унинг айтишича, хавфли осмон жисмларини Ердан 240 минг километр узоқликда йўқ қилиш керак, жанговар каллакчалар қуввати эса 100—200 мегатоннага тенг бўлиши лозим.
Сивков ўз таклифларини бемалол амалга ошириш мумкин дея ҳисобламоқда.
«Чуқур ҳисоб-китоблар шуни кўрсатдики, буларнинг барчаси учун ҳозирги Америка ҳарбий бюджетининг 25—30 фоизи талаб қилинади. Ушбу маблағларни жаҳон ҳамжамияти кўтара олади, бунинг устига уларни бирдагина эмас, 7—9 йил давомида ажратиш лозим», — дейди эксперт.
АҚШ ҳарбий бюджетининг 2018 йил учун Дональд Трамп томонидан тасдиқланган қиймати 700 миллиард долларни ташкил этади, Сивковнинг таклифини амалга ошириш учун эса 175—210 миллиард доллар етади.
Изоҳ (0)