Ўзбекистон Президенти Шавкат Мирзиёевнинг Бухоро вилоятига ташрифи давомида Пешку туманида вилоят фаоллари билан йиғилиш бўлиб ўтди. Йиғилишда вилоятдаги ҳар бир туман вакили видеоконференц-алоқа орқали Президентга мурожаат қилди.
Жумладан, Когон тумани номидан мурожаат қилган онахон туманда ичимлик суви қувурлари эскириб кетгани, уларни янгилаш бўйича ёрдам кераклигини таъкидлади.
«Бизда битта муаммо бор. У ҳам бўлса, аҳолининг 40 фоизи ичимлик суви билан таъминланган — лекин сув қувурлари 1970 йилларда ётқизилган. Ана шу ишда бизга амалий ёрдам беришингизни сўраймиз», — деди у.
Ўз мурожаати давомида когонлик онахон Президентга: «Бухоронинг етти пирлари сизни доимо қўлласин!», — деб тилак ҳам билдирди.
Мана шундай аёллар, ҳожи-оналар номидан айтилган тилаклар, «Етти пирлар қўллаб-қувватласин» деган гапларингиз менга катта куч бағишлайди. Худо қанча кўп куч берса, Ватанимиз, халқимиз учун шунча кўп меҳнат қиламиз. Шундай садоқатли, фидойи оналаримиз борлигидан жуда мамнунман.Ҳақиқатан ҳам, Бухоро қадимий жой. Ҳақиқатан ҳам, Бухорога сафарларимни Нақшбанд зиёратидан бошлашимнинг тагида ҳам кўп-кўп маъно бор. Буни тушунган одам тўғри тушунади. Шунинг учун, сизга катта раҳмат.
Биттагина илтимос қилдингиз, энди дарров 40 фоизини қилиш қийин. Когонга Солиев (уй-жой коммунал хизмат кўрсатиш вазири), Бекенов (иқтисодиёт вазири биринчи ўринбосари) боради, назоратини Музраф Икромов (Президент давлат маслаҳатчиси) қилади. Боринглар-да, Когоннинг таҳлилини айтинглар. Керак бўлса, қўшимча пул орқали берилади.
Албатта, биз сувни ҳал қиламиз. Когон туманини мен ўзим ҳам жуда яхши биламан, оғир пайтлари ўша ерда ўзим 72 кун ётганман. Когоннинг ҳар бир кўчасини яхши биламан. Бирга синовлардан ўтганмиз.
Шавкат Мирзиёев, Ўзбекистон Президенти
Изоҳ (0)