Мудофаа вазирлигида ҳарбий-ватанпарварлик, маънавий-ахлоқий тарбия ва ёшлар билан ишлаш бўйича органлари офицерлари иштирокида ўқув-услубий йиғин ўтказилди. Бу ҳақда «Дарё»га вазирлик матбуот хизмати хабар берди.
«Йиғиннинг асосий мақсади ҳарбий қисм ва муассасаларнинг жойлардаги ҳарбий-маъмурий секторлар билан ҳамкорликни йўлга қўйиш, қўшинларда Ўзбекистон Ёшлар иттифоқи бошланғич ташкилотларини тузиш ва уларнинг фаолиятини самарали шакллантириш, Мудофаа вазирлиги қўшинларида ҳуқуқбузарлик профилактикаси юзасидан ўтказиладиган чора-тадбирларнинг амалийлигини таъминлашдан иборат бўлди», — дейилади хабарда.
Йиғин иштирокчилари Қуролли Кучлар академияси фаолияти ва ўқув-тарбиявий жараёнлари билан танишди. Ислом Каримов номидаги илмий-маърифий мемориал мажмуаси ва Алишер Навоий номидаги миллий кутубхонасига саёҳат уюштирилди. Муқимий номидаги ўзбек давлат мусиқали театрида бўлиб, маданий ҳордиқ чиқарди. Ҳарбийлар ўртасида спортнинг футбол, волейбол, гандбол, баскетбол ва бошқа турлари бўйича мусобақалар ўтказилди.
Шунингдек, Тошкент ҳарбий округи дала-ўқув майдонларидан бирида ҳам мудофаа вазирлиги умумқўшин бўлинмалари взвод командирлари иштирокидаги ўқув-услубий йиғин бўлиб ўтди.
Ўқув жойларида тактик-саф машғулотларини ташкиллаштириш, шахсий таркибнинг машғулотларга тайёргарлиги кўригини ўтказиш тартибини, автомобиль, зирҳли техника, алоқа воситалари ва техникаларини, шахсий ҳимоя воситалари ва муҳандислик анжомларини ҳамда моддий-техник воситаларни тайёрлаш каби мавзулар бўйича иштирокчиларнинг билим ва кўникмалари оширилди.
Йиғин мобайнида взвод командирлари амалий-кўргазмали машғулотларда иштирок этиши билан бирга, машқлар жараёнига ўзлари ҳам бевосита иштирок этиб, қўйилган вазифаларни амалда бажарди.
Изоҳ (0)