Ўзбек божхонасига раҳбарликдан олинган Муиджон Тоҳирий, Фарғонада ёқиб юборилган тадбиркор, шамоллаб қолган Путин ва куннинг бошқа муҳим хабарлари

13 февралнинг эътиборга молик янгиликлари — «Дарё»нинг кечки дайжестида.

1. Божхона қўмитаси раиси этиб Муроджон Азимов тайинланди. Қўмитага 2016 йил декабридан бери раҳбарлик қилиб келаётган Муиджон Тоҳирий лавозимидан озод этилган.

2. Адлия вазирлиги паспорт ва прописка тизимини енгиллаштириш бўйича қарорлар лойиҳаларини ишлаб чиқди. Жумладан, паспорт олиш, таълим олиш, меҳнат қилиш ва бошқа ҳуқуқларни амалга оширишда прописка билан боғлиқ чекловларни бартараф қилиш режалаштирилган.

3. Фарғонада калтакланиб, ҳушсиз ҳолатга келтирилган тадбиркор ёқиб юборилди. Хабар беришларича, воқеа 3 февраль куни юз берган.

4. Самарқандда чиройли автомобиль рақамларини ўғирлаб, эвазига пул талаб қилаётган фирибгарлар пайдо бўлди. Охирги пайтда Самарқандда автомобиль давлат рақамларини ўғирлаш билан боғлиқ 30 та ҳолат кузатилган.

5. Давом этаётган воқеалар: Пастдарғом туманида 6 кишининг умрига зомин бўлган портлаш сабабларига аниқлик киритилди, Тошкентда эса автобус тагига ётиб олган ҳайдовчи жаримага тортилиб, 5 кунга қамалди.

6. Песков Путиннинг шамоллаб қолганини маълум қилди. Аммо, айтишларича, у касал бўлса ҳам, ишлашда давом этаркан.