Россия Фавқулодда вазиятлар вазирлиги қутқарувчилари Ан-148 самолёти ҳалокатга учраган ҳудудни текширувдан ўтказишни бошлади. Бу ҳақда ФВВ матбуот хизматига таяниб, «ТАСС» хабар берди.
«Айни вақтда ҳудуд учувчисиз учар қурилмалар ёрдамида текширилмоқда, қутқарувчилар ҳудудда мунтазам текширувларни ўтказмоқда. Улар занжир каби бир қатор бўлиб олиб, бутун майдонни диққат билан ўрганмоқда», — дейди агентлик суҳбатдоши. Унинг ойдинлик киритишича, мазкур ишлар ҳалок бўлганларнинг жасадларини ва фюзеляжнинг барча қисмларини топиш учун зарур.
ФВВ таъкидлашича, қидирув зонаси квадратларга бўлинган ҳолда ўрганилмоқда.
Фавқулодда вазиятлар вазирлиги миллий бошқармаси бошлиғининг биринчи ўринбосари Игорь Кутровскийнинг маълум қилишича, самолёт қолдиқлари 30 гектар майдонга ёйилиб кетган.
«Ҳозирда фавқулодда ҳолат оқибатларини бартараф этиш учун 780 киши ва 175 та техника, жумладан, тўққизта учувчисиз бошқариладиган қурилма жалб этилган», — дейилади хабарда.
Изоҳ (0)