Ахборот технологияларини ишлаб чиқиш ва жорий қилишни қўллаб-қувватлаш бўйича Mirzo Ulugbek Innovation Center инновация маркази томонидан талабаларнинг АКТ соҳасида Ўзбекистондаги етакчи корхоналарда амалиёт ўташини ташкил қилиш ишлари амалга оширилмоқда, деб хабар берди ЎзА.
Тошкент шаҳридаги Инҳа университети талабалари бу имкониятдан биринчилардан бўлиб фойдаланиш, ўқиш давомида олган билимларини тажрибада синаб кўриш, маҳаллий АКТ корхоналари фаолияти билан танишиш имкониятига эга бўлди. Амалиёт ўтаётган талаба уч ой мобайнида ўз билим ва кўникмаси, юклатилган вазифаларни бажаришни уддалай олишини намоён қилиши керак.
Университет ректори Сарвар Бобохўжаевнинг таъкидлашича, талабаларнинг мамлакатдаги ихтисослашган корхоналарда ишлаб чиқариш амалиётини ўташи уларга ўз иши ва ахборот-технологиялари бозорининг алоҳида хусусиятларини чуқур ўзлаштириш, ҳаётидаги муҳим босқичга қадам қўйиш ҳамда ўз профессионал фаолиятини бошлаш имконини беради.
Тошкент шаҳридаги Инҳа университетининг саккиз нафар талабаси Тошкентдаги 2005 йилдан буён интернет-лойиҳалар ва дастурий маҳсулотлар ишлаб чиқаришга ихтисослашган DataSite Technology компаниясида тажриба ўтамоқда. Бу ерда талабалар таълим олиш билан бирга, муҳим технологик лойиҳаларни амалга оширишга ҳам жалб қилинган. Бунда уларнинг ҳар бирига ўз йўналиши бўйича малакали мутахассис бириктирилган.
«Талабалар ишимизга тез ва осон мослашиши учун ходимларимиз билан тил топишиш, маҳсулотларимизнинг ишлаб чиқариш спецификаси билан танишишга хизмат қилувчи махсус тренинг ташкил этилди. Амалиёт тугагач, ҳар бир талабанинг ютуғи ва профессионал сифатлари баҳоланади, энг яхши талабаларга компаниямиздан иш таклиф қилинади», — дейди DataSite Technology компаниясининг HR-мутахассиси Г.Қорабоева.
Ахборот технологияларини ишлаб чиқиш ва жорий қилишни қўллаб-қувватлаш бўйича Mirzo Ulugbek Innovation Center инновация маркази олий таълим муассасалари ва касб-ҳунар коллежларининг «ахборот технологиялари» мутахассислиги бўйича битирувчиларини ишга жойлаштиришни таъминлаш, жумладан, иқтидорли ёшлар томонидан стартап лойиҳаларини амалга оширишда уларни қўллаб-қувватлаш йўли билан фаол иштирок этмоқда.
Изоҳ (0)