АҚШнинг Аризона университети олимлари томонидан маълум қилинишича, тахминан 74 минг йил аввал Тоба супервулқонининг отилиши, аввал ҳисобланганидек, инсониятнинг қирилиб кетишига олиб келмаган. Бу ҳақда Phys.org хабар берди.
Мавжуд назарияга кўра, Суматра оролида Тоба вулқонининг отилиши ҳавонинг совушига, атмосферага олтингугуртнинг тарқалиши ва кислотали ёмғирларга олиб келган ҳамда улар Шарқий Африкада ўсмлик дунёсини йўқотиб юборган ва ҳатто Шимолий Америка ҳудудига ҳам зарар етказган. Бунда вулқон булутларининг улкан қатлами Жануби-шарқий Осиё ороллари, Хитой ва Ҳиндистон ҳудудларини қоплаб олган.
«Бутилка бўғзи» назарияга кўра, ўша вақтда Африкадаги одамлар популяцияси 100 мингдан 10 минггача қисқарган, яъни инсоният деярли қирилиб кетган.
Аризона тадқиқотчилари Африкада жойлашган Малави кўлидаги Тоба вулқони отилишидан 100 йил аввал ва ундан 200 йил кейинги вақт оралиғида ҳосил бўлган ўсмликларнинг тошга айланган қолдиқларини ўрганган. Мутахассислар ўсмликлар таркибида вулқон қиши ҳақида маълумот бериши мумкин бўлган ҳеч қандай ўзгаришни пайқамаган. Озроқ совишга чидамсиз бўлган тоғ ўсмликларининг баъзи белгилари аниқланган, холос.
Олимларнинг сўзларига кўра, инсоният популяцияси Тобадан жиддий жабрланмаган бўлиши керак, чунки аҳоли яшаш жойлари ҳаво ҳароратининг пасайиши сезиларсиз бўлган тоғлар ёнбағрида жойлашган.
Изоҳ (0)