Қозоғистон бош прокурори Қайрат Кожамжаров йўловчи ташиш соҳасида текширувлар ўтказишга кўрсатма берди. Бу ҳақда бош прокуратура матбуот хизмати маълум қилди, дея хабар беради Tengrinews.
«Мунтазам бўлмаган йўловчи ташиш соҳасидаги таҳлиллар бу борада жиддий ва тизимли муаммолар мавжудлигини кўрсатмоқда. Йўловчи ташиш носоз ва ноқонуний равишда қайта жиҳозланган автобусларда, рухсат берувчи ҳужжатларсиз, йўл ҳаракати, йўловчи ташиш ва ёнғин хавфсизлиги қоидаларини бузган ҳолда амалга оширилмоқда», — дейилади хабарда.
Шу муносабат билан Қайрат Кожамжаров Транспорт бош прокуратураси ва вилоятлар прокуратураларига соҳада текшиувлар ўтказишни топширган. Улардан кўзда тутилган мақсад йўловчи ташиш қоидаларини қўпол равишда бузиб келаётган ташувчилар фаолиятига чек қўйиш, шунингдек, йўлларда авариялар ва фавқулодда вазиятларга олиб келувчи ҳолатларни бартараф этишдан иборат.
Эслатиб ўтамиз, олдинроқ Қозоғистон Транспорт қўмитасининг ҳудудий инспекциялари маъмурий полиция ходимлари билан ҳамкорликда «Автобус» тезкор-профилактик тадбирини ўтказаётгани маълум қилинганди.
Изоҳ (0)