Ўзбекистон матбуот ва ахборот агентлиги китоб тарқатувчилар ассоциацияси тузилаётганини маълум қилди.
«Ўзбекистонда йилига 3 минг номдан зиёд, қарийб 60 миллион нусхада адабиётлар нашр этилмоқда. Лекин уларни жойларга арзон нархларда, тўғридан-тўғри етказиб бериш масаласида муаммолар мавжуд. Шуни ҳисобга олиб, Ўзбекистон матбуот ва ахборот агентлиги ҳузурида китоб тарқатувчилар ассоциацияси тузилиши белгиланди», — дейилади хабарда.
Мазкур тузилманинг асосий мақсади китоб сотувчиларни бир жамоат ташкилоти атрофида жипслаштириш бўлиб, уларни ташкилий, услубий, илмий жиҳатдан қўллаб-қувватлаш, Ўзбекистондаги нашриётлар билан тўғридан-тўғри алоқа ўрнатишига кўмаклашиш, китоб савдоси менежментига ўргатиш, ўқувчиларнинг талаб ва эҳтиёжларидан келиб чиқиб, нашриётларнинг нашр режаларини шакллантириш, халқаро алоқаларни мустаҳкамлаш каби йўналишларда фаолият олиб боради.
Қайд этилишича, мазкур ассоциация китоб тарқатиш тизимини янада ривожлантириш, уларни сотиш бўйича аниқ механизмларни ишлаб чиқишга хизмат қилади. Шу кунларда ассоциациянинг ташкилий жиҳатлари кўриб чиқилмоқда.
Изоҳ (0)