Россиянинг Новосибирск шаҳридаги «Катта айиқ» савдо марказида бўлиб ўтган ва квартира ютуқ сифатида ўйналган ўйин ғолиби бошловчининг таниши бўлиб чиқди. Бошловчи ютуқ эгасига қўнғироқ қилганида, у бошловчининг исмини айтиб, қўнғироққа жавоб берган. Шу сабабли ижтимоий тармоқлар фойдаланувчилари ташкилотчиларни ёлғончиликда айблаган. Бу ҳақда «РИА Новости» хабар берди.
Савдо мажмуасида 20 январда харидорлар ўртасида ютуқлар ўйини бўлиб ўтган. Якунда маросим бошловчиси Антон Седов ўз мобил телефони орқали баланд овозда ғолибга қўнғироқ қилган. Бутун зал ғолибнинг «Салом, Антон», деган жавобини эшитган.
Савдо мажмуаси маъмурияти ўйин белгиланган тартибда, қоидаларга амал қилган ҳолда ўтказилганини маълум қилган. Таъкидланишича, Антон Седов машҳур киши ва унинг рақами кўпчиликда бўлиши табиий ҳолдир.
Хабар қилинишича, ютуқ эгаси бўлган Роман Колганов касб юзасидан ҳақиқатдан ҳам Антон Седов билан таниш бўлган. Бироқ Роман ўйинда белгиланган тартибда иштирок этганини, унда барча чеклар ва купонлар борлигини маълум қилган. Савдо мажмуаси ҳам буни тасдиқлаган.
Изоҳ (0)