Ақтўбеда ҳалок бўлган ўзбекистонликларга бағишланган хайрияда 160 млн сўм йиғилди

Ақтўбеда ҳалок бўлган ўзбекистонликларга бағишланган хайрияда йиғилган пул 160 миллион сўмдан ошди. Бу ҳақда хайрия ташкилотчиларидан бири, блогер Хушнудбек Худайбердиев Facebook’даги саҳифасида маълум қилди.

«20 январь куни яхши ниятлар билан хайрия акциясини эълон қилган эдик. Бугунгача акция доирасида 160 миллион сўмдан ортиқ пул йиғилди. Бунда Ўзбекистондан сўм пластикка ўтказилган, пул ўтказиш хизматлари орқали хориждан юборилган ҳамда PayPal тизими орқали ўтказилган электрон пуллар ҳисобга олинди.

Афсуски хорижий валюта ўтказмалари учун очилган Visa карта орқали пул қабул қилишнинг имкони бўлмади. Қандайдир банкдаги техник сабаблар туфайли хориждаги юртдошларимиз ушбу картага пул ўтказа олмадилар. Натижада хориждаги, айниқса Россия ва Кореядаги жуда кўплаб ҳамюртларимизнинг ният қилган эҳсонларини қабул қила олмадик.

Шунга кўра, биз яхши инсонларнинг кўмаги билан Россия ва Корея учун алоҳида ҳисоб рақами ташкил қилдик. Ишонамизки, бу қароримиз хайрия акцияси кўламини янада кенгайтиради ва тушадиган эҳсонлар миқдори янада ошишига ёрдам беради.

Эслатиб ўтамиз, дастлабки режаларимиз бўйича, халқимизнинг саҳовати натижасида ҳар бир марҳумнинг оиласига 10 миллион сўмдан ажратишни ният қилганмиз. Шунда тахминан 520 миллион сўм маблағ керак бўлади. Умид қиламизки, биргалашиб, ушбу довонни бемалол забт эта оламиз», — дейилади хабарда.

Таъкидланишича, айни пайтгача 12 миллион сўмдан ортиқроқ пул тарқатилган. Келаётган дам олиш кунлари Наманган ва Фарғона вилоятига бориб, қолган суммаларни ҳам тарқатиш режалаштирилган. «Бунда бизга маҳаллий ҳокимият вакиллари катта амалий ёрдам кўрсатмоқда, улар билан доимий ҳамкорлик йўлга қўйилган», — деб ёзди блогер.

Сўмда пул ўтказиш учун пластик рақами (исталган миқдорда, чекловлар йўқ):

8600 3104 3723 2663Карта Нажмиддинов Баҳриддин номига очилган.

Россия ва МДҲдаги ўзбекистонликлар қуйидаги манзилга пул ўтказишлари мумкин:

63900218 9070623784Юсупов Урал Хужакулович номига очилган («Сбербанк Maestro»)

Кореядаги ўзбекистонликлар қуйидаги манзилга пул ўтказишлари мумкин:

1002-856-118459 Woori Bank (АТМдаги коди 020)Dadajonov Rakhimjon номига очилган

Хориждагилар PayPal тизими орқали қуйидаги манзилга пул ўтказишлари мумкин:

paypal.me/AbrorjonKodirov (abrorkodirov.uz@gmail.com)

Саволлар туғилганда Telegram ва WhatsApp орқали +998946119998 (Хушнудбек) рақамига мурожаат қилишингиз мумкин.