Тошкентда LG Q6+ смартфони 1,85 млн сўмдан сотувга чиқди

Ўзбекистонда LG G6 флагманининг соддалаштирилган версияси сифатида тавсифланадиган LG Q6+ смартфони сотила бошлади, деб ёзади «Mobinfo.uz».

Телефоннинг асосий ўзига хослиги — NFC-модул бўлиб, у қурилмани Android Pay тўлов тизими орқали харидларга пул тўлашда қўллаш имконини беради. Бунда ҳар сафар ҳимоя паролини киритиш керак бўлади, чунки ушбу мобил қурилмада бармоқ изи сканери мавжуд эмас.

Смартфон 5,5 дюймли ва 2160×1080 пикселли FullVision IPS-экран, 8 ядроли Qualcomm Snapdragon 435 процессори, 3 Гб тезкор ва 32 Гб ички хотира, 13 мегапикселли асосий ва 5 мегапикселли олд камера, 3000 мА/соат сиғимли аккумулятор билан жиҳозланган.

Қурилма Android 7.1.1 Nougat операцион тизимида ишлайди.

Тошкентдаги «Малика» савдо марказида LG Q6+ (32 Гб) 1 852 000 сўмдан сотилмоқда.

Ушбу қурилмани кўрсатилган нархда сотиб олишга «Дарё» нашри кафолат бермайди. Қурилма ва унинг нархи ҳақидаги ахборот фақат танишиш учун тақдим этилган.