Ўзбекистон Президенти Шавкат Мирзиёевнинг Сурхондарё вилоятига ташрифи давом этмоқда.
Президент матбуот хизмати ахборотига кўра, Шавкат Мирзиёев 20 январь куни «Амударё» болалар оромгоҳи ва Бахшилар мактабини бориб кўрган.
ЎзА ахборотига кўра, Сурхондарё дарёси бўйида 200 ўринли дам олиш маскани қурилиб, 2017 йил ёз мавсумида фойдаланишга топширилган эди. Оромгоҳда умумтаълим мактабларининг иқтидорли ўқувчилари, ижтимоий ҳимояга муҳтож оилалар фарзандлари, имконияти чекланган болалар дам олдирилиб, соғломлаштирилади.
Маскан 6,2 гектар майдонни эгаллаган. Тўртта ётоқхона, амфитеатр, ошхона, сузиш ҳавзаси, спорт майдонлари, бошқа бино ва иншоотлар бунёд этилиб, зарур инвентарлар билан жиҳозланган. Болаларнинг мазмунли дам олиши, бўш вақтида турли тўгаракларда қатнашиши учун шароит яратилган.
Оромгоҳга кираверишдаги ота-оналар фарзандлари билан учрашадиган бинода иккита фитобар, ахборот-ресурс маркази, маънавият ва маърифат хонаси, машғулот заллари мавжуд. Инглиз тили, тасвирий санъат, моҳир қўллар, компьютер саводхонлиги каби 15 яқин тўгаракда мураббийлар машғулот олиб боради. Тиббиёт бўлимида болалар учун физиотерапевтик муолажалар, массаж, фитодаволаш хизматлари ва жисмоний тарбия машқлари ташкил этилади.
Шавкат Мирзиёев бу муассасада болаларнинг мароқли дам олиши, саломатлигини мустаҳкамлаши, овқатланиши ва яшаши учун яратилган шароитлар билан танишди.
2018 йил март ойидан оромгоҳ йил давомида узлуксиз фаолият юрита бошлайди. Унга Ўзбекистоннинг барча ҳудудидан фан олимпиадалари, халқаро танлов ва спорт мусобақалари ғолиблари бўлган 5—11-синф ўқувчилари, ёзги таътилда эса 1000 нафар ўғил-қиз қабул қилинади.
Бугунги кунда оромгоҳ Ўзбекистон Ёшлар иттифоқи тасарруфига ўтказилиб, уни халқаро ёшлар оромгоҳига айлантириш режалаштирилмоқда.
Оромгоҳ ҳузурида умумтаълим мактаби барпо этилган. Мактаб негизида 125 ўринли бахшилар мактаби ҳам фаолият юритади. Ўқувчилар бу ерда халқ оғзаки ижоди ҳамда ўзбек халқ чолғуларидан сабоқ олади. Дарс машғулотларини малакали ўқитувчилар билан бирга тўрт нафар Ўзбекистон халқ бахшиси олиб боради.
Президент мактабда Ўзбекистон халқ бахшилари Шоберди Болтаев ва Абдуназар Поёнов билан мулоқот қилди. «Мустақиллик бахшилари» китобини чиқариш, вилоятдаги коллежларда ҳам ушбу санъат турини ўқитиш юзасидан мутасаддиларга топшириқлар берди.
Изоҳ (0)