Ўзбекистон Президенти Шавкат Мирзиёев Термиз шаҳрида янги барпо этилган 700 ўринли Санъат саройи ҳамда 3 минг ўринга мўлжалланган амфитеатрда яратилган шароитларни кўздан кечирди. Бу ҳақда Президент матбуот хизмати хабар бермоқда.
ЎзА ахборотига кўра, бу иншоотларда «Файз-Бинокор-Олтиариқ» компанияси томонидан 82 миллиард сўмликдан зиёд қурилиш-монтаж ишлари амалга оширилган. Франция, Англия, Испания, Россия ва Хитойдан овоз ёзиш ҳамда созлаш, ёритиш тизими ускуналари, мониторлар келтириб ўрнатилган.
Хорижлик меҳмонларга тўғридан-тўғри таржима қилиб бериш учун кабиналар, санъаткор ва актёрлар хоналари махсус жиҳозлар билан таъминланган. Ҳудуди 32,5 гектар бўлган масканнинг атрофи ободонлаштирилиб, кўкаламзорлаштирилган. Мусиқали фаввора, автотураргоҳ қурилган, замонавий ёритгичлар ҳамда ўриндиқлар ўрнатилган.
«Президент бу ерда Тошкент тетрлари билан ҳамкорликда маҳорат дарслари ўтказиш, спектакллар қўйиш, хусусан, давлат буюртмаси асосида Исо ат-Термизий ва Альпомиш ҳақида асарлар яратиш зарурлигини таъкидлади», — дейилади Президент матбуот хизмати ахборотида.
Бундан ташқари, Шавкат Мирзиёев театр ижодкорлари учун кўп қаватли уй бунёд этиш бўйича ҳам топшириқлар берган.
Изоҳ (0)