O‘zbekiston Prezidenti Shavkat Mirziyoyevning Surxondaryo viloyatiga tashrifi davom etmoqda.
Prezident matbuot xizmati axborotiga ko‘ra, Shavkat Mirziyoyev 20-yanvar kuni “Amudaryo” bolalar oromgohi va Baxshilar maktabini borib ko‘rgan.
O‘zA axborotiga ko‘ra, Surxondaryo daryosi bo‘yida 200 o‘rinli dam olish maskani qurilib, 2017-yil yoz mavsumida foydalanishga topshirilgan edi. Oromgohda umumta’lim maktablarining iqtidorli o‘quvchilari, ijtimoiy himoyaga muhtoj oilalar farzandlari, imkoniyati cheklangan bolalar dam oldirilib, sog‘lomlashtiriladi.
Maskan 6,2 gektar maydonni egallagan. To‘rtta yotoqxona, amfiteatr, oshxona, suzish havzasi, sport maydonlari, boshqa bino va inshootlar bunyod etilib, zarur inventarlar bilan jihozlangan. Bolalarning mazmunli dam olishi, bo‘sh vaqtida turli to‘garaklarda qatnashishi uchun sharoit yaratilgan.
Oromgohga kiraverishdagi ota-onalar farzandlari bilan uchrashadigan binoda ikkita fitobar, axborot-resurs markazi, ma’naviyat va ma’rifat xonasi, mashg‘ulot zallari mavjud. Ingliz tili, tasviriy san’at, mohir qo‘llar, kompyuter savodxonligi kabi 15 yaqin to‘garakda murabbiylar mashg‘ulot olib boradi. Tibbiyot bo‘limida bolalar uchun fizioterapevtik muolajalar, massaj, fitodavolash xizmatlari va jismoniy tarbiya mashqlari tashkil etiladi.
Shavkat Mirziyoyev bu muassasada bolalarning maroqli dam olishi, salomatligini mustahkamlashi, ovqatlanishi va yashashi uchun yaratilgan sharoitlar bilan tanishdi.
2018-yil mart oyidan oromgoh yil davomida uzluksiz faoliyat yurita boshlaydi. Unga O‘zbekistonning barcha hududidan fan olimpiadalari, xalqaro tanlov va sport musobaqalari g‘oliblari bo‘lgan 5—11-sinf o‘quvchilari, yozgi ta’tilda esa 1000 nafar o‘g‘il-qiz qabul qilinadi.
Bugungi kunda oromgoh O‘zbekiston Yoshlar ittifoqi tasarrufiga o‘tkazilib, uni xalqaro yoshlar oromgohiga aylantirish rejalashtirilmoqda.
Oromgoh huzurida umumta’lim maktabi barpo etilgan. Maktab negizida 125 o‘rinli baxshilar maktabi ham faoliyat yuritadi. O‘quvchilar bu yerda xalq og‘zaki ijodi hamda o‘zbek xalq cholg‘ularidan saboq oladi. Dars mashg‘ulotlarini malakali o‘qituvchilar bilan birga to‘rt nafar O‘zbekiston xalq baxshisi olib boradi.
Prezident maktabda O‘zbekiston xalq baxshilari Shoberdi Boltayev va Abdunazar Poyonov bilan muloqot qildi. “Mustaqillik baxshilari” kitobini chiqarish, viloyatdagi kollejlarda ham ushbu san’at turini o‘qitish yuzasidan mutasaddilarga topshiriqlar berdi.
Izoh (0)