Давлат статистика қўмитаси Ўзбекистон олий таълим муассаса (ОТМ)ларида стипендия олувчи талабаларнинг рейтинг баллари бўйича тақсимланишини эълон қилди.
Қўмита ахборотига кўра, ҳозирда Ўзбекистон ОТМларида таҳсил олаётган талабаларнинг 273 904 нафари стипендия олади. Максимал рейтинг баҳоси (86—100 фоиз)га эга аълочи талабалар сони 18 972 нафарни, юқори рейтинг баҳоси (71—85 фоиз)га эга «тўртчи» талабалар 65 123 нафарни, ўрта рейтинг баҳоси (55—70 фоиз)га эга «уччи» талабалар 189 809 нафарни ташкил этади.
2017 йил 1 декабридан талабаларнинг стипендиялари миқдори «уччи»лар учун 290 535 сўм, «тўртчилар» учун 435 803 сўм, аълочилар учун 581 070 сўм миқдорида белгиланган.
Ушбу суммалар бўйича 273 904 талабанинг стипендияси миқдори хомаки ҳисоб-китоб қилинса, бир ойда давлат бюджетидан 94 551 016 624 (тўқсон тўрт миллиард беш юз эллик бир миллион ўн олти минг олти юз йигирма тўрт) сўм ажратилади.
Аммо стипендиатлар, етим болалар, ногирон бўлиб қолган собиқ ҳарбийлар, собиқ байналмилалчи жангчилар, ОТМларда математика, амалий математика ва информатика, ахборот технологиялари ва ахборот хавфсизлиги мутахассисликлари бўйича таълим олаётган талабалар, кар-соқов ва кўзи ожиз талабаларга стипендиялар юқорироқ ҳисобланиши инобатга олинса, бир ойда давлат бюджетидан стипендияларга ажратиладиган сумма 100 миллиард сўм атрофида, деб ҳисоблаш мумкин.
Изоҳ (0)