Давлатлар томонидан субсидияланган Россия, Қозоғистон ва Ўзбекистон корхоналарининг АҚШга уран етказиб бериши ядровий ёқилғи учун маҳаллий хом ашё ишлаб чиқарувчиларнинг мавжудлигига хавф туғдиради. Бу борада Американинг Ur-Energy ва Energy Fuels компаниялари АҚШ Савдо вазирлигига петиция йўллади, деб хабар берди «Интерфакс».
Маълумотлага кўра, Колорадода жойлашган Ur-Energy ва Energy Fuels компаниялари ҳисобига 2017 йилда АҚШда ишлаб чиқарилган уранларнинг ярмидан кўпи тўғри келган. Аммо компаниялар АҚШ ички бозорининг атиги 5 фоизини таъминламоқда, Россия, Қозоғистон ва Ўзбекистондан қилинаётган экспорт ҳажми эса 40 фоизга яқин. Хитойдан сезиларли ҳажмда уран олиб келинмаган, бироқ Хитой ўзининг ядровий қувватини яхшигина ўстириб, Америка ядровий бозорига ўзининг ядровий ёқилғилари билан киришга тайёр эканлигини билдирди.
Бундан ташқари 2020 йилда Россиядан уран импорт қилиш борасидаги битим ўз ниҳоясига етади, бу эса америкалик ишлаб чиқарувчиларга қўшимча босим бўлиб хизмат қилади.
2017 йил АҚШда уран қазиб олиш тарихдаги минимумига эришган бўлса, 2018 йил башоратлари бўйича ушбу кўрсатгич бундан ҳам паст бўлади. Яқин йиллар ичида Россия ва Хитойдан ядровий ёқилги импортини кучайтириш режалаштирилган, бу эса АҚШда уран ишлаб чиқарилишига рақобат қилади.
Шу муносабат билан Energy Fuels ва Ur-Energy компаниялари АҚШ Савдо вазирлигидан уран импортининг Америка миллий хавфсизлигига етказиши мумкин бўлган таъсирларини ўрганишни сўрамоқда.
Изоҳ (0)