Google қидирув тизимида Россиянинг амалдаги президенти Владимир Путин давлат раҳбарлигига бўлғуси сайловлар ғолиби деб кўрсатилишига сабабчи бўлган хатолик тузатилди, деб ёзади «РБК». Айни пайтда тизим «Россияда 2018 йилги президент сайловлари» ва «2018 йилги сайловлар» деган сўровлар киритилган ҳолатларда тўғри натижаларни чиқариб бермоқда.
«Викимедия»нинг Россиядаги бўлинмаси ижрочи директори Станислав Козловский аниқлик киритишича, хатолик «Википедия»да бўлғуси сайлов ҳақидаги мақолани таҳрирлаб қўйган фойдаланувчи туфайли келиб чиққан. «Номаълум киши сайловлар ҳақидаги мақоланинг кириш қисмига Путиннинг фамилиясини ёзиб қўйган, шундан кейин қидирув тизими натижаларда уни кўрсатган», — деди у.
Козловскийнинг қўшимча қилишича, онлайн-энциклопедиядаги камчилик 20 дақиқадан сўнг бартараф қилинган, шундан кейин хато Google’дан йўқолган.
Аввалроқ рус, инглиз ёки немис тилида «сайлов 2018 Россия» («вибори 2018», «election 2018 russia», «präsidentschaftswahl russland 2018») деб қидирувга берилганида, саҳифада «ғолиб — Путин Владимир Владимирович» шаклидаги жавоб келиб чиқаётган эди.
Изоҳ (0)