ЎзА Миллий ахборот агентлиги Учтепа тумани газ таъминоти корхонасидаги ҳолатни кескин танқид остига олди. Гап шундаки, республиканинг чекка ҳудуди эмас, Тошкентнинг Учтепа туманидаги идорада тартибсизлик, узундан-узоқ навбатда туриш, мутахассислар учун ҳам, истеъмолчилар учун ҳам ҳеч қандай шароитнинг йўқлиги, навбат кутиш учун ўтирғичлар қўйилмаганлиги ҳолати кузатилган.
«Бу пойтахтимизнинг Учтепа тумани газ таъминоти корхонасидаги манзара, —дейилади хабарда. — Бино зали тўлов қилиш учун келган фуқаролар билан тўлган. Бу ердаги кассаларда навбат кутиб турганларни санасангиз, саноқдан адашиб кетасиз.
‘Ўзсаноатқурилиш банк’ ва ‘Ипотека-банк’ акциядорлик тижорат банкларининг бешта мутахассиси ишламоқда. ‘Ипотека-банк’нинг учта мутахассиси учун бинонинг кириш йўлаги бурчагида стол-стуллар қўйилган. Қолган иккита мутахассис учун бир хона.
Бинода нафақат мутахассислар учун, балки истеъмолчилар учун ҳам ҳеч қандай шароит йўқ. Атиги битта ўтирғич бор, холос. Ёш болалар йиғлаган, кексалар деворга суянган, яна кимдир навбатдан қолиб кетмаслик учун оёқ устида омонатгина ўтирибди. Агар олдиндаги кишини адаштириб қўйсангиз, қайтиб навбатингизни топиб бўпсиз.
Тўловларни қабул қилаётган ходимларнинг қўли-қўлига тегмайди. Атрофда ғала-ғовур. Ким навбат олган, яна кимдир дардини айтган, бошқаси тўлов нотўғри бўлди, деб нолиган. Мана шундай шароитда касса ходимлари бироз чалғиса, ё ёзишда, ёки пул санашда адашади. Шундай ҳам бўлиб турибди.
– 2017 йил ноябрь ойининг 10-санасида, декабрнинг 16-санасида тўлов тўлаганман, – дейди ўзини Рустам деб таништирган йигит. – Ҳозир яна тўлов қилмоқчи бўлиб текширтирсам, декабрдаги пул тушмаган эмиш. Ўша пайтда ишлаган кассир бола ҳозир бу ердагилар орасида йўқ. Бошқаларига мурожаат қилсам, ҳамкасби қилган ишга бошқаси жавоб беролмас экан. ‘Яхшиси, банкнинг тумандаги филиалига бориб келинғ, дейишди. Бу ерда ишим битмади. Лекин бир кунни деярли йўқотдим.
Хуноби ошган йигит шу гапларни айтдию, шошиб банкка кетди. Хўш, банк мутахассислари ўз ишига жавоб бермайдими? Нега банк мутахассисларини ушбу муассасага юборар экан, бу масалани ўйлаб кўрмайди? Уларнинг қилган хатоси учун истеъмолчи овора бўлиши керакми?
Ушбу муассасадаги ишлар давлатимиз раҳбарининг 2017 йил 13 ноябрдаги ‘Электр энергияси ва табиий газ назорати ва ҳисобининг автоматлаштирилган тизимини жадал жорий этиш чора-тадбирлари тўғрисида’ги қарори асосида ташкил этилган. Аммо қарорда белгиланганидек, кўрсатилаётган хизматлар сифатини яхшилаш, етказиб берилган табиий газ учун ҳисоб-китобларни ўз вақтида амалга оширишни ташкил этишда камчиликлар кўзга яққол ташланмоқда.
– Шароитимиз ёмонлиги, фуқаролар учун қулайликлар йўқлигини юқори ташкилотларга айтганмиз, – дейди ташкилотнинг газни сотиш ва ҳисобга олиш бўйича етакчи муҳандиси Самиғ Фозилов. – Лекин натижа бўлгани йўқ. Асосан тўлов тўлаш учун ҳар ойнинг ўнинчи санасигача тирбандлик кўп бўлади.
Бу гап қанчалик ҳақиқат?
– Бу ерда доим навбат кутасиз, – дейди Боғобод маҳалласида яшовчи Роҳила Садирова. – Қарздорлигингизни, пулингиз тушган ёки тушмаганини текшириш учун ҳам алоҳида навбат олиб, кейин кирасиз. Ойнинг қайси кунида келишингизнинг аҳамияти йўқ. Пенсияда бўлганим учун болаларимнинг уйини, ўзимизнинг уй тўловларини вақтим бемалол деб ўзим тўлаб юраман. Лекин ҳаммада бундай имконият йўқ. Кассалар сонини кўпайтириб, кутиш жойларида қулай шароитлар яратилса, биз, кексаларга ҳам яхши бўларди. Эрталаб келгандим. Ҳозир вақт тушликка яқинлашди.
Ўзбекистон Республикаси Вазирлар Маҳкамасининг 2017 йил 10 июлдаги ‘Ўзбекистон Республикаси Бош прокуратураси ҳузуридаги Мажбурий ижро бюросининг электр энергияси ва табиий газ етказиб берувчилар билан ўзаро ҳамкорлик қилиш тартиби тўғрисидаги ҳамда Истеъмолчиларни электр ва газ тармоқларидан узиб қўйиш тартиби тўғрисидаги низомларни тасдиқлаш ҳақида’ги қарори асосида тизимли ишлар амалга оширилмоқда.
Учтепа тумани Мажбурий ижро бюроси техник кузатув шуъбаси муҳандиси Рустам Лутфуллаевнинг айтишича, улар аҳолининг ҳал бўлмаётган муаммоларини ечишга ёрдам беришади.
– Мана кўринг, ҳар ойнинг ўнинчисигача тўловларни тўлаймиз, – дейди Журжоний маҳалласида яшовчи Тоҳира Йўлдошева. – Лекин ўз вақтида тўласам ҳам яна пеня ёзилаверади. Икки, уч, тўрт марта шундай бўлди. Майли, деб тўлаб юрдим. Энди ‘Менга тушунтириб беринглар. Бундай бўлиши мумкин эмас’ десам, ‘Биз билмаймиз, Тошкент шаҳар газ таъминоти корхонасига бориб келинғ, деяпти. Сарсон қилишади. Бу фақат менда эмас. Кўпчилик шу муаммонинг ортидан овора.
Яна оворагарчилик
Шунда ҳам иш бица, хўп-хўп. Агар уларни яна тумандаги масъул ходимга учрашинг, деб қайтариб юборишса-чи? Келса, яна навбатда туриши керак. Унда бир ишни ҳал этиш учун неча кун зарур бўлади? Фуқароларнинг айтишича, газ таъминоти корхоналарида истеъмолчиларнинг вақтини олиш, узоқ вақт ишини битириб бермасдан қўпол муомалада бўлиш каби ҳолатлар тез-тез учраб турар экан.
Президентимиз Шавкат Мирзиёев ташаббуси билан олиб борилаётган кенг кўламли ислоҳотлар, чуқур ва пухта ўйланган лойиҳалар ҳаётга татбиқ этилаётган айни паллада пойтахтимизда бўлаётган бундай ишларга нима деб изоҳ бериш мумкин?»
Изоҳ (0)