Ўқитувчиларни урганидан сўнг танилиб кетган Сирдарё вилояти Сайхунобод тумани собиқ ҳокими Носиржон Эгамбердиев ўз аризасига кўра ишдан бўшаган. Бу ҳақда, Сирдарё вилояти ва Сайхунобод туман ҳокимликларига асосланиб, «Газета.uz» хабар бермоқда.
Аввалроқ Носиржон Эгамбердиев 8 январь куни Сайхунобод тумани ҳокими лавозимидан кетгани маълум бўлган эди. Дастлабки хабарларда ҳоким айнан нима сабабдан ишдан кетганига аниқлик киритилмаган эди.
Носиржон Эгамбердиев 2016 йил октябридан бери Сайхунобод туманига ҳокимлик қилиб келаётган эди. Бунгача, маълумотларга кўра, у Сирдарё вилоят ўрта махсус, касб-ҳунар таълими бошқармасига раҳбарлик қилган.Сирдарё вилоятидаги манбанинг «Дарё»га маълум қилишича, 42 ёшли Носиржон Эгамбердиев 1996 йили Гулистон давлат университетини, 2011 йили Тошкент молия институтини тамомлаган. Мутахассислиги бўйича ўқитувчи, молиячи.
Меҳнат фаолиятини Сайхунободдаги 36-мактабда ўқитувчиликдан бошлаган. 1998 йили маълум муддат Сайхунобод туман Давлат солиқ инспекциясининг умумий бўлимига раҳбарлик қилгани ҳисобга олинмаса, 1996 йилдан 1998 йилга қадар Сайхунободдаги мактабларда дарс берган.
2002—2003 йилларда Гулистон шаҳар ҳокимлигида, 2003—2010 йилларда эса Сирдарё вилояти ҳокимлигида турли масъул лавозимларда ишлаган. Ундан кейинги даврда вилоят таълим бошқармаларига раҳбарлик қилган.
Эгамбердиев 2017 йил сентябрида — Сайхунобод туманидаги мактаб директорларини Мустақиллик байрамига етарлича томошабин олиб кела олмагани учун ҳақоратлаб, калтаклаётгани акс этган видео тарқалиб кетгач, танилган эди.
Вазият юзасидан Сирдарё вилоят прокуратураси текширув олиб борган, декабрь ойида ҳокимга қарши очилган маъмурий ҳуқуқбузарлик тўғрисидаги иш кўриб чиқиш учун туман судига юборилгани ҳақида хабар берилган эди.
Ҳокимга қарши илгари сурилган маъмурий жавобгарлик моддалари бўйича Носиржон Эгамбердиев энг кам иш ҳақининг 40 бараваригача жаримага тортилиши, шунингдек, 15 суткагача маъмурий қамоққа олиниши мумкин.
Изоҳ (0)