Эронда амалдаги ҳукуматни қўллаб-қувватловчи ва яқинда бўлиб ўтган норозилик акцияларини қораловчи тинч намойишлар иккинчи кундирки давом этмоқда. Бу ҳақда «РИА Новости» хабар бермоқда.
Эроннинг Press TV телеканали маълумотларига кўра, намойишларда бир неча минг киши қатнашмоқда. Намойишлар бутун мамлакат бўйлаб — шимолдаги Теҳрон ва Семнон, жанубдаги Кирмон ва ғарбдаги Элом вилоятларида ўтказилмоқда.
Аввалроқ IRNA агентлиги мамлакатнинг амалдаги раҳбариятини қўллаб-қувватлашга қаратилган намойишлар жума намозидан сўнг бошлангани, Теҳрон вилоятидаги Рай, Дамаванд, Шаҳриёр, Пакдашт, Работкарим шаҳарларида давом этаётгани ҳақида хабар берган эди.
Мазкур тинч намойиш иштирокчиларининг фикрича, яқинда бутун Эронни қамраб олган норозилик чиқишлари аслида «мамлакат душманлари» томонидан уюштирилган эди. Агентликнинг қайд этишича, намойиш қатнашчилар «АҚШ малайлари — шарманда», «Коррупционерлар жазосини олсин» каби шиорларни кўтариб чиққан.
Изоҳ (0)