АҚШ киноакадемияси аъзолари 5 январь куни «Оскар» мукофотига номзодларнинг исми ёзилган бюллетенларни топширишни бошлади. Бу ҳақда Gold Derby’га таяниб, «РИА Новости» хабар берди.
Киноакадемиклардан онлайн-аризалар 12 январга қадар, яъни саккиз кун давомида қабул қилинади.
Ташкилотчиларнинг маълум қилишича, йилнинг энг яхши картинаси номига 341 та тўлиқ метражли бадиий фильм даъвогарлик қилмоқда. «Хориж тилидаги энг яхши фильм» номинацияси учун дунёнинг 92 давлатидан фимлар қабул қилинган.
«Оскар»нинг барча тоифаларидаги номзодларининг номи 23 январь куни маълум қилинади. Овоз беришнинг финал босқичи 20 февралдан 27 февралга қадар бўлиб ўтади, ғолиблар номи «Оскар»нинг 4 март куни Лос-Анжелесда бўлиб ўтадиган 90-тақдирлаш маросимида эълон қилинади.
АҚШ кинематографияси фанлари ва санъати академияси 6 мингга яқин кино ҳамда бошқа соҳа арбобларини ўзида бирлаштирган. Алоҳида йўналишдаги номзодлар ташкилотнинг тегишли бўлинмаларининг академиклари томонидан аниқланади, «Йилнинг энг яхши картинаси» учун эса барча киноакадемиклар овоз беради.
Изоҳ (0)