Ўзбек миллий туристик брендини хориж мамлакатларида оммалаштириш чора-тадбирлари доирасида Давлат туризм қўмитаси Ўзбекистоннинг Ҳиндистондаги элчихонаси билан биргаликда Travelхp телеканали суратга олиш гуруҳининг Ўзбекистонга сафарини ташкиллаштирди, деб хабар берди UzDaily.
Сафардан мақсад Ўзбекистоннинг сайёҳлик салоҳияти ҳақида фильм тайёрлаш ва уни 2018 йил давомида такрорий давр билан телеканалда узатишдан иборат.
Беш кишидан иборат ижодий гуруҳ 2017 йилнинг 12 декабридан 23 декабрига қадар Ўзбекистонда бўлди. Сценарийга кўра Ўзбекистон ҳақидаги фильм Тошкент шаҳрида (диққатга сазовор масканлар, телеминора, Мустақиллик майдони, метрополитен, вокзал), Тошкент вилоятида (Чорвоқ ва Чимён), Самарқанд, Шаҳрисабз, Бухоро ва Хивада суратга олинди.
Travelхp хусусий телеканали 2011 йилда ташкил топган ва туризм соҳасига ихтисослашган. Телеканал кўрсатувлари сунъий йўлдош ва симли каналлар орқали бутун Ҳиндистон, шунингдек, бир қатор бошқа мамлакатлар бўйлаб намойиш этилади.
Изоҳ (0)