2017 йил давомида нархлар, тарифлар, ойликлар, солиқлар ва турли тўловлардаги энг муҳим ўзгаришларни қуйидаги суратда кўриш, ўзгаришлар тафсилоти билан сурат остидаги шарҳда танишиш мумкин.
2017 йил давомида буханка нон нархи ва Тошкент шаҳридаги жамоат транспорти (автобус, метро) учун тўловларда ўзгариш кузатилмади. Буханка нон 2014 йилда (650 сўм), жамоат транспорти 2016 йилда (1200 сўм) белгиланган нархларини сақлаб қолди.
Марказий банк қайта молиялаш ставкасини 28 июндан йиллик 9 фоиздан 14 фоизгача кўтарди.
Газ ва электр энергияси, иссиқ ва совуқ сув учун тарифлар июль ойида 5—7 фоизга ошди.
1 декабрдан иш ҳақи, пенсиялар, стипендиялар ва нафақалар миқдори 15 фоизга ошди. Айни вақтда энг кам иш ҳақига боғланган барча тўловлар, жумладан, йўл ҳаракати қоидабузарлиги учун жарималар миқдори ҳам 1 декабрдан 15 фоизга ошди.
GM Uzbekistan 1 июндан ўзи ишлаб чиқарган машиналарни фақат сўмда сотишга ўтди. Аммо автомобиллар нархи долларга боғлангани сабаб, уларнинг нархи ҳар ҳафта — долларнинг расмий курси ошиши муносабати билан, 4 сентябрга қадар мунтазам ўсди. 5 сентябрдан GM Uzbekistan ўз машиналарни нархини тўлиқ сўмда белгилади ва шундан буён нархларда ўзгариш кузатилмади. Давлат статистика қўмитаси енгил автомобиллар нархи йил давомида 50,2 фоизга ўсганини маълум қилди.
Алоқа компаниялари тўловлари доллар курсига «боғлангани» муносабати билан, 1 январдан 4 сентябрга қадар доллар 3231,48 сўмдан 4210,35 сўмга ошгани сабаб, тўловлар суммаси ҳам ошиб борди. 5 сентябрдан бошлаб эса тўловларда ўзгариш бўлмади.
АҚШ доллари курси йил бошидан сентябргача 30 фоизга ўсган бўлса, 5 сентябрь куни унинг курси 4210,35 сўмдан бирданига 8100 сўмга ошди. 2017 йилнинг энг охирги душанбасида эса доллар курси 8120,07 сўмга етди ва йиллик ўсиш 151 фоизни ташкил этди.
Изоҳ (0)