«Ўзбекистон» телеканалининг «Учбурчак» ток-шоусининг сўнгги — 23 декабрда эфирга узатилган сони ижтимоий тармоқларда муҳокамаларга сабаб бўлди. Кўрсатувда муаммоси кўрсатилган аёллардан бири ичкиликка ружу қўйган эрининг ахлоқсизлигидан шикоят қилган. «Дарё» жабрдийда аёлнинг кечмишини қисқача баён қилади.
Мирободлик Дилдора Баратова — тўрт яшар қизалоқнинг онаси, турмуш қурганига беш йил бўлган. У оиласини сақлаб қолиш, турмуш ўртоғини тўғри йўлга солиш, турли ғийбат гаплар чиқмаслиги учун кўп уринган, бироқ ҳозирга келиб фарзандининг тирик етим бўлишига рози.
Унинг турмуш ўртоғи ичкиликка қаттиқ ружу қўйган — янги куёвлигининг 13-кунида уйга ўта маст ҳолда келиб, хотинини танимай, онаси (Дилдоранинг қайнонаси)нинг ҳам қаршилигига қарамай, Дилдорани дўппослаб, уни подездга чиқариб қўйган. Тўйгача ҳам турли енгилтабиат аёлларни уйга бошлаб келадиган одати бўлган. Сўнгги вақтларда уйда яланғоч юриш одатини чиқарган. Маст кунлари қизалоғи билан яланғоч чўмилишни хоҳлайди — Дилдора норозилик билдирса, иккисини калтаклаб, кўчага ҳайдайди. Бу ҳолатлар қизалоқнинг руҳиятига салбий таъсир қила бошлаган.
Дилдоранинг эри ичкиликка ружу қўйганидан маҳалла-кўй ҳам хабардор — у маст ҳолида қўшнилари билан ҳам, маҳалладаги ўткинчилар билан ҳам кўп бора уришган. Ҳатто бир ойда беш марта туман ИИБга олиб кетилган. Аёлнинг айтишича, эри уни «уриб, кўкартириб ташлаган»ида ҳам, у ҳеч қачон 102 га қўнғироқ қилмаган. «Ажрашиш учун турмуш қурмаганман», — деб айтган Дилдора, кўрсатув давомида бир неча бор ўзини тута олмай йиғлаб юборган.
Аёл эрини даволатиш учун уни ёзда Наркология диспансерига ётқизган, ўз вақтида домлаларнинг олдига ҳам олиб борган. У «оиламни сақлаб қолишим керак, инсоф бериб қолар», деган умид билан яшаб келган. Дилдора истиқомат қиладиган маҳалла қўмитасининг раиси унга ота уйига бориб яшашни тавсия қилган. Аёлнинг онаси вафот этган, отасининг иккинчи оиласи бор.
«Учбурчак» кўрсатуви бошловчиси Нилуфар Умрзоқова Тошкент шаҳар Миробод тумани ҳокимлиги ва ички ишлар идораларини ушбу вазиятга эътибор қаратишни сўраб, шу кунларда қизчаси билан сарсон-саргардон бўлаётган Дилдора Баратовани кўчада қолдирмасликни сўраган. Шунингдек, телебошловчи «бу мавзуга яна қайтиш»га ваъда берган.
Изоҳ (0)