Корея Республикаси полицияси ёнғин содир бўлиб, 29 киши ҳалок бўлган спорт-кўнгилочар мажмуаси хўжайини ва комендантини ҳибсга олди, деб ёзади «ТАСС».
Уларнинг иккаласи ҳам одамлар ўлимига олиб келган бепарволикда, шунингдек, ёнғин хавфсизлиги қоидаларини бузганликда айбланмоқда. Полиция аниқлашича, ёнғин чоғида иккинчи қаватдаги эҳтиёт чиқиш эшиги ёпиқ бўлган, шу туфайли у ердаги сауна ташрифчилари хонадан чиқиб кета олмаган.
Бундан ташқари, бино ичкарисидаги автомобиллар тураргоҳида автоматик ўт ўчириш тизими ишламаган, у ерда қисқа туташув натижасида ёнғин бошланган эди. Шунингдек, текширувлардан маълум бўлишича, юқори қаватларда ноқонуний равишда иккита балкон қурилган ва улар совуқ ўтказмайдиган ёнувчан материаллар билан қопланган бўлиб, бу олов тез тарқалишига сабабчи бўлган.
21 декабрь, пайшанба куни кечаси фитнес марказида содир бўлган ёнғин оқибатида 29 киши ҳалок бўлган ва яна 29 киши жароҳат олган. Қурбонларнинг аксариятини бинонинг иккинчи ва учинчи қаватида жойлашган саунага ташриф буюрган фуқаролар ташкил этган.
Изоҳ (0)