iPhone X эгалари смартфоннинг яна бир камчилиги ҳақида гапириб берди

iPhone X эгалари Face ID (юзни таниб олиш тизими) ёрдамида оилавий харидларни амалга ошириш иложи йўқлиги ҳақида гапириб берди, деб ёзади «РИА Новости».

Ars Technica хабарига кўра, iPhone’нинг аввалги моделларида Touch ID (бармоқ изини таниб олиш тизими) оилавий харидларни тасдиқлаш имконини берарди. Аммо Apple’нинг янги қурилмаси эгалари шикоят қилишича, улар, масалан, болалари томонидан бошқа қурилмадан амалга оширилган харидларни тасдиқлаш учун энди Apple ID паролини киритишига тўғри келади, чунки буни iPhone X’да Touch ID ўрнини эгаллаган Face ID ёрдамида амалга оширишнинг иложи йўқ.

Аввалроқ Face ID телефон эгаси 13 ёшдан кичик бўлса, унинг юзини таниб олишда хатоликларга йўл қўйиши маълум бўлган эди. Бундан ташқари, фойдаланувчилар юзни таниб олиш тизими эгизакларни фарқлай олмаслигини айтган эди.