Тошкентда икки экранли Meizu Pro 7 смартфони 2,8 млн сўмдан сотила бошлади

Ўзбекистонда Meizu компаниясининг топ-смартфони — Pro 7 модели сотила бошлади, деб ёзади «Mobinfo.uz».

Янги қурилма Германия ва Американинг Frog Design қўшма корхонаси билан ҳамкорликда ишлаб чиқилган оригинал дизайни билан фарқланади. Унга мувофиқ, смартфоннинг орқа панелига қўшимча дисплей ўрнатилди, унда фақат энг муҳим билдиришномалар акс этади. Бундан ташқари, унинг ёрдамида камеранинг қўш модулида селфи олиш мумкин. Қўшимча экран AMOLED технологияси бўйича яратилган ва 1,9 дюймлидир.

Meizu Pro 7 ҳар бири 12 мегапикселли асосий қўш камера, 16 мегапикселли олд камера, MediaTek Helio P25 / Helio X30 процессори, 4 Гб тезкор ва 64 Гб / 128 Гб доимий хотира, 5,2 дюймли асосий экран, 3000 мА/соат сиғимли аккумуляторга эга.

Тошкентдаги «Флешка» («Малика») савдо мажмуасида Meizu Pro 7 нинг 64 гигабайтлик версияси 2,8 миллион сўм, 128 Гб версияси эса — 3,6 миллион сўмдан сотилмоқда.

Ушбу қурилмани кўрсатилган нархда сотиб олишга «Дарё» нашри кафолат бермайди. Қурилма ва унинг нархи ҳақидаги ахборот фақат танишиш учун тақдим этилган.