БМТ Хавфсизлик кенгаши 22 декабрь, жума куни КХДРга қарши санкцияларнинг қатъийлашганини кўзда тутувчи резолюцияни бир овоздан қабул қилди, деб хабар беради «Интерфакс».
«Овоз бериш жараёни натижалари қуйидагича: Кенгашнинг 15 нафар аъзоси резолюция қабул қилинишини ёқлаб, овоз берди. Резолюция лойиҳаси бир овоздан қабул қилинади», — дейди Хавфсизлик кенгаши раиси, Япониянинг БМТдаги доимий вакили Коро Бешо.
АҚШ томонидан тайёрланган резолюция лойиҳаси кенгаш аъзоларига яқинда тарқатилган эди.
БМТ Хавфсизлик кенгашининг Шимолий Корея бўйича ҳужжати нефть маҳсулотларини етказиб беришни кескин қисқартиришни кўзда тутади.
Шу тарзда КХДРга нефть, жумладан дизель ёқилғиси ва керосин етказиб беришни қарийб 90 фоизга камайтириб, уларнинг ҳажмини йилига 500 минг баррелга тушириш таклиф этилмоқда.
Бундан ташқари, КХДРга турли хил минерал моддалар, кимёвий товарлар, электр жиҳозлари, шунингдек айрим озуқавий маҳсулотлар етказиб бериш тақиқланади.
Шунингдек, барча мамлакатларга Шимолий Корея портларидан келаётган ёки у ердан кетаётган кемаларни тўхтатиш, тинтув қилиш ва ушлаб туриш ҳуқуқи берилади.
АҚШ томонидан Шимолий Кореянинг 15 нафар фуқароси ва халқ қуролли кучлари вазирлигини санкциялар рўйхатига киритиш таклиф қилинди.
КХДР ишчи кучидан фойдаланаётган мамлакатлар бир йил ичида ўз ҳудудидан шимолий кореялик ишчиларни депортация қилиши керак.
Изоҳ (0)