2017 йилнинг 20—21 декабрь кунлари «Қамчиқ» довонида «Табиий ва техноген тусдаги фавқулодда вазиятларни бартараф этишда Тошкент ва Наманган вилоятлари ФВДқТга кирувчи хизматлар ҳамда бошқарув органлари куч ва воситаларининг ҳаракати» мавзусида қўмондонлик-штаб ўқув машқи ўтказилди, деб хабар берди ФВВ матбуот хизмати.
Ўқув машқи ФВДқТга кирувчи бошқарув органли ва кучларини «Фавқулодда вазиятлар» режимига ўтказиш ҳамда авария-қутқарув ва бошқа кечиктириб бўлмас ишларни олиб боришни ўз ичига олган бир неча босқичларда ўтказилди.
Шунингдек, ўқув машқи доирасида бир қатор ўқув нуқталарида махсус-тактик машқлари ўтказилди. Уларда қидирув-қутқарув ишларини ташкил этиш, вайроналар остидан ва йўл транспорт ҳодисасига учраган автомобиллардан жабрланганларни қутқариш, биринчи тиббий ёрдам кўрсатиш, аҳолини хавфсиз ҳудудларга эвакуация қилиш тадбирлари амалда синаб кўрилди. «Ангрен—Поп» йўлналишида ҳаракатланувчи темир йўлда юзага келиши мумкин бўлган фавқулодда вазиятларнинг оқибатларини бартараф этиш бўйича амалий машқ ҳам ташкил этилди.
Довонда, айниқса, қишки мавсумда содир бўлиши мумкин бўлган турли фавқулодда вазиятларнинг олдини олиш ва оқибатларини бартараф этиш масалалари кўриб чиқилди.
Бу каби тезкор тадбирларни бажаришда энг замонавий авария-қутқарув махсус техникалар, асбоб-анжомлардан кенг фойдаланилди ва ўтказилган ўқув машқларига малакали қутқарувчилар жалб этилди.
Икки кун давомида ўтказилган қўмондонлик-штаб ўқув машқининг якуний муҳокамаси идоралараро тезкор штаб биносида бўлиб ўтди. Унда кузатувчи ва экспертлар фикрлари тингланиб тегишли хулосалар чиқарилди.
Изоҳ (0)