БМТ Бош ассамблеяси 21 декабрь, пайшанба куни кўпчилик овоз билан Қуддуснинг Исроил пойтахти сифатида тан олинишига қарши резолюцияни қабул қилди. Бу ҳақда «ТАСС» хабар бермоқда.
Яман ва Туркия томонидан тайёрланган матн АҚШ БМТ Хавфсизлик кенгашида блокировка қилган резолюция лойиҳасини деярли тўлиқ такрорлайди.
Қўшма Штатлар Қуддусни Исроил пойтахти сифатида тан олишига жавоб бўлган ҳужжатни 128 давлат, жумладан, Россия, Европа ва Лотин Америкасидаги кўпчилик давлатлар, араб ва ислом дунёси мамлакатлари қўллаб-қувватлади.
Ҳужжатга 9 давлат, хусусан, АҚШ ва Исроил қарши чиқди.
Бош ассамблеянинг 35 аъзоси овоз бериш чоғида бетараф қолди. Улар қаторида Евроиттифоқнинг қатор давлатлари (Венгрия, Латвия, Польша, Руминия ва Чехия), Австралия, Аргентина, Канада ва Мексика бор.
Яна 20 давлат, жумладан, Грузия ва Украина умуман муносабат билдирмади ва овоз бериш пультидаги учта тугмадан ҳеч бирини босмади.
Изоҳ (0)