АҚШ президенти маъмурияти 2012 йили Россиядаги айрим шахсларга қарши қабул қилиниб, 2016 йили глобал мақомга эга бўлган «Магнитский қонуни» доирасида 13 киши ва 39 ташкилотга қарши санкциялар жорий этди. Тегишли фармон президент Дональд Трамп томонидан 21 декабрь куни имзоланди, деб хабар беради «Газета.uz».
Рўйхатга Ўзбекистон Биринчи Президенти Ислом Каримовнинг қизи Гулнора Каримова ҳам кирди. АҚШ маъмурияти у «давлат ресурсларини бизнесни экспроприация қилиш, бозорларни монополлаштириш, пора ундириш ва рэкет мақсадида ишлатган кучли уюшган жиноят бирлашмаси»га раҳбарлик қилган деб ҳисобламоқда.
Эслатиб ўтамиз, шу йилнинг июль ойида Ўзбекистон Бош прокуратураси Гулнора Каримовага нисбатан 2013 йилда қўзғатилган иккита жиноят иш ҳақида ахборот берган эди.
Изоҳ (0)