Афғонистонда қўшма лойиҳаларни амалга оширишда Ўзбекистон мутахассислари ва фуқаролари хавфсизлиги биринчи галдаги вазифа ҳисобланади. Бу ҳақда Олий Мажлис Сенатининг 13-пленар йиғилишида Ўзбекистон ташқи ишлар вазирининг ўринбосари Ғайрат Фозилов маълум қилди, деб хабар беради «Газета.uz».
Афғонистон президенти Ашраф Ғанининг Тошкентга ташрифи давомида қатор йирик лойиҳалар, жумладан, Сурхон — Пули Хумри электр узатиш линияси ва Мозори Шариф — Шибирғон — Маймана — Ҳирот темир йўли қурилиши бўйича келишувларга эришилганди.
Сенаторлар йиғилишда Афғонистоннинг шимолий вилоятларида ИШИД террорчилари мавқеи мустаҳкамланаётганини инобатга олган ҳолда имзоланган келишувлар қандай амалга оширилиши билан қизиқди.
«Афғонистон томони билан музокаралар бошлангандан бери ва Ашраф Ғанининг ташрифини тайёрлаш вақтида афғон дўстларимизга мазкур лойиҳаларни биргаликда амалга оширишда мутахассисларимиз ва фуқароларимиз хавфсизлиги биринчи галдаги вазифа эканлигини очиқ билдирганмиз», — деди вазир ўринбосари.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)