Таиландлик денгизчи ярим йил денгизда сузиб, уйига қайтди. Қариндошлари уни арвоҳ деб ўйлади, чунки у ҳужжатларга асосан ўлган ва 2017 йилнинг май ойида куйдирилган. Бу ҳақда «РИА Новости» хабар берди.
Балиқ овловчи кемада ярим йилни денгизда ўтказган Сакхон Сачива деярли ҳеч қайси портга кирмасдан ўз қишлоғига қайтди. Унинг қайтиши қариндошлари ва қўшниларини ваҳимага солган. Қариндошлар денгизчига тегиб кўрмагунча уни арвоҳ деб ўйлаган.
Маълум бўлишича, 2017 йилнинг 18 майида Бангкок полицияси Сачивалар оиласига балиқчининг ошқозон-ичак касалидан пойтахтдаги касалхоналардан бирида вафот этгани ҳақида хабар юборган. Бир неча кундан сўнг қариндошлар Бангкокка етиб келган ва касалхонадан жасадни ёпиқ тобутда олиб кетган ҳамда уни денгизчининг туғилган қишлоғи яқинидаги ибодатхонада куйдирган.
Денгизчининг айтишича, у денгизга мянмалик бошқа бир матрос билан чиққан. Мьянмалик денгизчи унинг Таиланд фуқароси эканлиги ҳақидаги ҳужжатини ўғирлаган ва портлардан бирида қочиб кетган. Денгизда мобил алоқанинг йўқлиги сабабли Сачива бу ҳодисадан сўнг қариндошлари билан бирор марта гаплаша олмаган. Кема ҳам бирор марта Таиланд портларида тўхтамаган. Сачива ўғирланган ҳужжат ўрнига янгисини мянмалик денгизчи қочиб кетган порт шаҳардаги маъмуриятдан ҳодисадан икки кун ўтгач олган.
Энди унинг ҳужжати бўлса ҳам, денгизчи ўзининг тирик одам мақомини тиклаш учун узоқ жараёнлардан ўтиши керак бўлади. Полиция Сачиванинг ўрнига куйдирилган одамнинг шахсини аниқлашга уринмоқда.
Изоҳ (0)