Денис Истомин бугунги кунда Ўзбекистоннинг биринчи рақамли теннисчиси ҳисобланади. Аслида у Оренбургда таваллуд топган ва кейинчалик Ўзбекистон фуқаролигини қўлга киритган.
«Оламспорт» нашрида аксинча, Ўзбекистонда туғилиб, кейинчалик фаолиятини бошқа мамлакатларда давом эттиришга қарор қилган спортчилар борасида мақола чоп этилди. Муаллиф Хусниддин Мирзалиев бунда тўрт нафар ракетка устасига эътибор қаратиб ўтган.
Варвара Лепченко
Лепченко Варвара Петровна 1986 йилнинг 21 май куни Тошкентда туғилган. У Бутрус ҳамда Лариса Лепченколар оиласида дунёга келган, Жане исмли синглиси ҳам бор.
Тошкентлик теннисчи етти ёшидан теннис ўйнашни бошлади. Фаолиятининг дастлабки йилларида Варвара Ўзбекистондаги халқаро мусобақаларда қатнашди. Бироқ федерация билан зиддият туфайли, у кейинчалик ўз чиқишларини тўхтатди.
2000 йилдан буён Лепченко АҚШнинг Нью-Йорк шаҳрида доимий яшайди. 2007 йилнинг 17 сентябридан эса АҚШ байроғи остида мусобақаларда иштирок этишга ҳаракат қилди. 2011 йилга келиб Варвара АҚШ фуқаролигини қўлга киритган бўлиб, шундан сўнг у расман америкалик ракетка устаси сифатида турнирларда таништирила бошланди.
Варвара фаолияти давомида 10 дан ортиқ ITF мусобақаларида ғалаба қозонган. Бир марта WTA турнирида финалигача етиб борган. У ТОП-100’нинг доимий аъзоларидан бири. Лепченконинг рейтингдаги энг юқори кўрсаткичи 2012 йилнинг 10 октябрига тўғри келади. Ўшанда теннисчи 19-ўрингача кўтарила олганди. Ҳозирги эса 63-поғонадан жой олган.
Марсель Илҳан
Бу теннисчининг асл исми Ҳамдамов Марсель Қаҳҳорович. У 1987 йил 11 июнь куни Самарқандда туғилган. Айни вақтда Туркия шарафини ҳимоя қилади.
Марсель — Қаҳҳор ҳамда Мария Ҳамдамоваларнинг ягона ўғлидир. У 6 ёшидан бошлаб Самқаранддаги спорт мактабида теннис билан шуғулланди. 2006 йилнинг кузида фамилиясини Илҳан деб ўзгартирди ва Туркия байроғи остида мусобақаларда иштирок эта бошлади. Ҳозирда Истанбул шаҳрида яшайди.
Илҳан шу кунга қадар челленжернинг 4 та мусобақасида, фьючерс туркумига кирувчи мусобақаларнинг яккаликда 18 тасида, жуфтлик беллашувларида эса 2 марта ғалаба нашидасини сурган. Рейтингдаги энг юқори чўққиси 2015 йилнинг 2 мартига тўғри келади. Ўшанда Марсель 77-ўрингача кўтарила олганди.
Шундан сўнг спортчини кетма-кет жароҳатлар безовта қила бошлади. Ҳозирги вақтда 305-поғонани эгаллаб турибди.
Влада Якшибарова
1989 йилнинг 14 мартида Ўзбекистонда туғилган Влада Якшибарова профессионал фаолиятини 2003 йилда бошлаган ва 2016 йилгача Ўзбекистон шарафини ҳимоя қилган. Теннисчига Дрор Дивиш ҳамда отаси Костя Миллер мураббийлик қиларди.
У 2016 йилдан буён Исроил шарафини ҳимоя қилмоқда. Фаолияти давомида ITF туркумига кирувчи мусобақаларнинг 20 тасида ғолиб чиққан. Шулардан 8 тасида Влада яккаликда, 12 маротабасида жуфтликда зафар қучган. Рейтингдаги энг юқори натижаси 2008 йилнинг 14 июлига тўғри келади —352-ўрин.
Фаолияти давомида Влада Туркия, Исроил, Таиланд, Қозоғистон каби давлатлар мезбонлигида ўтган мусобақаларни ютган.Глеб Сахаров
Юқоридаги теннисчилар орасига Глеб Сахаровни ҳам қисман қўшсак бўлади, деб ёзган муаллиф. У 1988 йилнинг 10 июнида Тошкент шаҳрида дунёга келган. Бироқ ўсмирлик даврида Францияга кўчиб ўтган. Ҳозир Франция фуқароси ҳисобланади. Шундан келиб чиқиб, Ўзбекистон учун халқаро мусобақаларда умуман иштирок этмаган.
Глеб фаолияти давомида фьючерс туркумига кирувчи мусобақаларнинг яккалигида 10 марта, жуфтлигида 9 марта зафар қучган. Бу мавсум Глеб учун айниқса омадли келиб, у 13 ноябрь кунги рейтингга кўра, ўзи учун энг юқори бўлган 155-ўрингача кўтарилди.
Изоҳ (0)