«Роскачество» (Россия сифат тизими) Истеъмолчилик синовлари ташкилотлари халқаро ассамблеяси билан ҳамкорликда iPhone X’ни кўрикдан ўтказди. Синов натижалари «Роскачество» сайтида эълон қилинди.
iPhone X Ғарбий Европадаги лабораторияда 274 та мезон бўйича синовдан ўтказилди. Улар орасида асосий ва олд камера тестлари, мустаҳкамлик ва сув ўтказмаслик қобилияти синови, қувват олиш ва аккумуляторнинг қувват йўқотиш тезлиги ва бошқа синовлар бор эди.
«Apple’нинг энг янги смартфони айланаётган қувурга жойлаштириш ва бир неча ўнлаб марта 80 сантиметр баландликдан ташлашдан иборат чидамлилик синовидан ўта олмади. iPhone X ушбу мезон бўйича бор-йўғи 2,9 балл тўплаб, ‘Роскачествo’ томонидан синовдан ўтказилган 310 та модель орасида охиридан олтинчи бўлди. Бу телефонни тушириб қўймаслик керак: қувур 50 марта айлангач, iPhone X’нинг экрани синди — унда яшил чизиқлар пайдо бўлди, 100 марта айланганидан кейин эса — орқа панель синди, дисплей эса тамоман ишламай қолди», — дея хулоса қилди мутахассислар.
0,5 дан 5,5 бўлган шкалада энг юқори баллни смартфоннинг 72 та параметри намоён қилди. Бош аспектлар сифатида мутахассислар «бенуқсон» олд камерани, симсиз қувват олиш имкониятини, дисплейни (шу жумладан, унинг контрастлиги ва ёрқинлиги), асосий камеранинг имкониятлари ва унинг созламаларини, шунингдек, «фойдаланишнинг тушунарлилиги ва оддийлиги»ни қайд этди.
Якуний жадвалда iPhone X 11-ўринда жойлашди. Ундан олдинги поғоналарни iPhone 6, 6s, 8 ва 8 Plus каби Apple қурилмаларининг аввалги версиялари ҳамда Samsung смартфонлари ва LG G6 эгаллади.
Изоҳ (0)