2019 йилда Самарқанд шаҳридаги Сиёб бозори ҳудудида барча қулайликларга эга уч қаватли гипермаркет қад ростлайди, деб хабар беради «Самаркандский вестник».
Ҳозирги кунда вилоят шаҳар ва туманлардаги деҳқон бозорларини қайта таъмирлаш ва ободонлаштириш ишлари амалга оширилмоқда.
Ишлаб чиқилган ҳудудий дастурга кўра, жорий йилнинг июль ойидан бошлаб Самарқанд шаҳридаги Темирйўл деҳқон бозори ва Жомбой, Ургут, Каттақўрғон ҳамда Булунғур туманларидаги марказий бозорлар реконструкция қилинмоқда. Мазкур бозорларда тўртта турдаги замонавий гипермаркет, супермаркет ва минимаркетлар қад ростламоқда.
Бозорга ёндош ҳудудларда осон йиғиладиган ва қуриладиган металл конструкциялардан фойдаланган ҳолда савдо павильонлари қурилади.
2020 йилнинг 1 январига қадар Самарқанд вилоятининг бошқа туманларидаги бозорлар ҳам реконструкция қилиниши режалаштирилмоқда.
Шунингдек, жорий йилнинг 1 апрелидан бошлаб бозорлар атрофидаги автотураргоҳлар бозор маъмурияти ҳисобига ўтказилди. Натижада автотураргоҳларнинг санитар ҳолати яхшиланди, маҳаллий бюджетга пул тушуми кенгайди.
Савдо мажмуаларини қуриш, деҳқон бозорлари ҳудудини ободонлаштириш ва бозорлар атрофида автотураргоҳларни барпо этиш Ташқи иқтисодий фаолият миллий банкининг Самарқанд вилояти филиали томонидан молиялаштирилмоқда.
Самарқанд вилоятидаги деҳқон бозорларини реконструкция қилиш учун 36 миллиард 23 миллион сўм кредит маблағлари ажратилади. Ҳозирги кунга қадар Ташқи иқтисодий фаолият миллий банкининг ҳудудий бўлинмалари томонидан 7,9 миллиард сўмдан ортиқ маблағ ажратилди.Ўктам Қувондиқов, Ташқи иқтисодий фаолият миллий банкининг Самарқанд вилояти филиали кредит бўлими мутахассиси
Изоҳ (0)