Халқаро космик станция (ХКС)да махсус сайёҳлик модули ташкил этилади. Бу ҳақда Россиянинг «Энергия» ракета-коинот корпорацияси бош директори Владимир Солнсев маълум қилди, дея хабар бермоқда «Газета.ru».
«Бу — юқори даражада шинам, 4—6 кишига мўлжалланган, икки ҳожатхонаси, иллюминаторлари одатдагидан кўра каттароқ бўлган, коинотдаги саёҳат вақтда зарур бошқа қулайликларга эга модул бўлади», — деди Солнсев.
Унинг сўзларига кўра, бўлма учун ҳозирги вақтда ХКС учун тайёрланаётган илмий-энергетик модул шакли асос қилиб олинади.
«Энергия» корпорацияси ҳисоб-китобларига кўра, йилига олти нафардан сайёҳ учирилса, бундай бўлма етти йилдан ўзига сарфланган пулни оқлайди. Айни вақтда, бўлманинг тайёрланиши қанчага тушиши маълум қилинмаяпти.
Қайд этиш жоиз, 2001 йилдан 2009 йилга қадар ХКСда жами етти нафар космик сайёҳ меҳмон бўлган.
Изоҳ (0)