Енгил атлетика орқали ўзбекистонлик спорт мухлисларига яхши таниш бўлган Надия Дусанова Украинанинг Одесса шаҳрида «Олтин Мангуст» халқаро мукофоти билан тақдирланди. Бу ҳақда Ўзбекистон енгил атлетика федерацияси матбуот хизмати «Дарё»га маълум қилди.
Дусанова бундай мукофотга спорт ва жисмоний тарбия ривожига қўшаётган ҳиссаси учун лойиқ кўрилган. «Олтин Мангуст» халқаро соврини ҳам айнан шунинг учун таъсис этилган.
«Олтин Мангуст» спортчиларнинг жисмоний тарбия ва спорт ривожига қўшаётган ҳиссасидан келиб чиқиб, уларни ҳақли тарзда тақдирлайдиган ягона халқаро совриндир. Унда барчасига объектив баҳо берилади. Йиллик тақдирлаш маросимидан асосий мақсад, спортдаги энг яхши анъаналарни сақлаб қолиш ва уларни оммалаштиришдан иборат. Биз бунда жаҳонга таниқли спортчиларни саралаб олишга ҳаракат қиламиз. Шу тариқа ҳар йили мунтазам равишда саҳнамизда энг яхшилардан тузилган ва рамзий маънода «Ғалаба боғлари» деб ном олганлар гуруҳи пайдо бўлади.Магомед Магдиев, «Мангуст» жамоатчилик ташкилоти президенти
«Мангуст» жамоатчилик ташкилоти 2009 йилдан буён ўзи таъсис этган «Олтин Мангуст» мукофотини таниқли спортчиларга топшириб келади. Бунда таъсисчилар мукофот эгаларини доимий равишда Одесса шаҳрига таклиф этиб, уларга совринни фақатгина шу шаҳарда топширади.
1987 йилда таваллуд топган Надия Дусанова баландликка сакраш бўйича халқаро тоифасидаги спорт устаси ҳисобланади.