Қирғизистон президенти Сооронбай Жээнбеков Россия олдидаги 240 миллион доллар қарзни ҳисобдан чиқариш ҳақидаги қонунни имзолади. Бу ҳақда давлат раҳбарининг матбуот хизмати маълум қилди, деб хабар беради «Коммерсантъ».
Ташаббус Қирғизистон парламенти томонидан 2 ноябрда маъқулланган эди. Гап 2012 йил 20 сентябрда эришилган 488,9 миллион доллар қарздорликни бартараф этиш ҳақидаги келишув ҳақида кетмоқда.
Россия 2013 йили Қирғизистоннинг 188,9 миллион доллар қарзидан кечди, 300 миллион доллар миқдоридаги қолган сумма эса 10 йил давомида, ҳар йили 30 миллион доллардан ҳисобдан чиқариб борилиши керак эди.
«240 миллион доллар миқдоридаги қарзни бирйўла ҳисобдан чиқарилиши давлат ташқи қарзининг ЯИМга нисбатан даражасини 3,8 фоизга қисқартиради ва мамлакатнинг давлат қарзи ҳажмига ижобий таъсир кўрсатади», — дейилади Қирғизистон президенти маъмурияти изоҳида.
Изоҳ (0)