Американинг Калифорния штатида бир ҳафта давом этган кучли ўрмон ёнғинлари ниҳоясига етмоқда, деб ёзади «ТАСС».
Мингдан ортиқ турар-жой ва қурилишни вайрон қилган олов билан курашда натижа кўзга ташланди, бироқ ўнлаб янги ёнғин ўчоқлари юзага келиши хавфи юқорилигича қолмоқда.
Калифорния губернатори Жерри Браун табиий офатни Ердаги глобал исиш билан боғлади ва ҳар йили Рождество арафасида ўрмон ёнғинларининг ўчирилиши нормал ҳолат бўлиб қолиши мумкинлигидан огоҳлантирди.
«Бу янги норма. Яқинда ҳар Рождествога ёнғинни ўчиришга тайёргарлик кўришга тўғри келади. Бу ўта кераксиз ва ноодатий ҳодиса. Инсонлар уйидан, мулкидан айрилиши ёки уларнинг ҳайвонларининг нобуд бўлиши даҳшатли. Биз бу даҳшатни бартараф этмоқчимиз», — деди Браун.
Калифорния ёнғинга қарши муҳофаза ва ўрмонларни ҳимоя қилиш бошқармасининг маълумотларига кўра, қўшимча кучлар ва махсус техникани жалб қилиш самара берди. Бу ҳаракатлар натижасида ёнғин кенг ёйилишининг олди олинди ва аҳолининг бир қисми ўз уйларига қайтарилди.
Изоҳ (0)