15 декабрь куни британиялик поп-қўшиқчи Робби Уильямс Ўзбекистонда ўзининг яккахон концертини тақдим этади. Бу ҳақда концерт ташкилотчилари «Дарё»га маълум қилди.
Робби Уильямс — машҳур Take That гуруҳининг собиқ аъзоси. Робби қўшиқчиликни бошлаганидан буён унинг альбомлари 59 миллиондан зиёд нусхада сотилган. Баъзи альбомлари эса бир неча бор «платина» мақомини олган. Унинг «Feel», «Supreme», «Batter Man» ва «Миллиэнниум» каби қўшиқлари хит даражасига кўтарилган.
Элтон Жон Роббининг овоз тембри ва ижорадаги маҳорати сабаб унга «XXI асрнинг Фрэнк Синатраси» дея таъриф берган. 2005 йилда Робби Уильямс «Intensive Care» альбомини қўллаб-қувватлаш мақсадида тур уюштиришини маълум қилгач, бир кунда 1,6 миллион донадан ортиқ чипта сотилган. Бунинг натижасида Робби Гиннеснинг рекордлар китобидан ўрин олган.
17 декабрь куни соат 19:00 да эса Тошкентдаги «Ўзбекистон» халқаро анжуманлар саройида испаниялик таниқли тенор Хосе Каррерас Ўзбекистон Миллий симфоник оркестри жўрлигида концерт беради.
Оркестрга дунёга машҳур дирижёрлардан бири — испаниялик маэстро Давид Гименес бошчилик қилади. Гименес мунтазам равишда Хосе Каррерас, Пласидо Доминго, Анна Нетребко, Кири Те Канава, Роберто Аланя, Анжела Георгиу каби қўшиқчилар билан ҳамкорлик қилиб келади.
Опера оламининг энг кўзга кўринган вакилларидан бўлган Хосе Каррерас ўзининг профессионал карьерасини 1970 йилда бошлаган. Каррерас ўзининг дастлабки операларини дунёга машҳур театрларда ижро этган, жумладан, Миландаги Ла-Скала, Нью-Йоркдаги Метрополитан Опера, Лондон Қироллик опера театри шулар қаторида.
Хосе Каррерас кўплаб, дунёга машҳур дирижёрлар билан ҳамкорлик қилган, улар орасида Герберт фон Караян, Клаудио Аббадо, Риккардо Мути, Лорин Маазел, Риккардо Шайли, Колин Дэвис, Жузеппе Синополи, Жеймс Левин, Карло Мария Жулини, Леонард Бернштейн ва Зубин Мета мавжуд.
Каррераснинг рэпертуаридан 60 дан ортиқ опералар опералар ўрин олган. Улар орасида энг машҳурлари — «Богема», «Дон Карло», «Кармен», «Ла Forza дел Destino» ва ҳакозо.
Унинг ижро услуби ҳар бир одамга тушунарли, маҳорати ва жозибаси эса — такрорланмас. Бироқ испаниялик хонанда фақатгина бу билан танилмаган. Бутун дунёни ҳайратга солган жиҳатлардан бири — Каррераснинг рэпертуари бароккодан замонавий мусиқагача бўлган 600 дан ортиқ турли услубларни ўз ичига қамраб олган.
Бўлиб ўтадиган концертлар миллиардер Алишер Усмоновнинг Ўзбекистон халқига янги йил совғаси ҳисобланади. Бу Ўзбекистон аҳолиси учун фақатгина янги йил совғаси бўлиб қолмай, балки бой маданиятга эга Ўзбекистон хорижлик юлдузлар учун ҳам қизиқиш уйғотаётганлигининг ёрқин мисолидир.
Концерт чипталарининг бир қисми 11 декабрь, душанба кунидан эътиборан«Истиқлол» санъат саройининг кассаларида сотувга чиқади.
Изоҳ (0)