«Яндекс. Мусиқа» 2017 йилнинг энг оммабоп қўшиқларини эълон қилди

«Яндекс. Мусиқа» фойдаланувчилари 2017 йилда кўпроқ хориж хонандаларини тинглаган, деб хабар беради «Ведомости».

Йилнинг энг оммабоп қўшиқлари ўнталигига рус тилидаги тўртта қўшиқ ҳам киритилган.

Рейтингнинг биринчи поғонасидан британиялик хонанда Эд Ширан жой олди. «Яндекс. Мусиқа» маълумотларига кўра, фойдаланувчилар унинг Shape Of You қўшиғини энг кўп тинглаган.

Рейтингнинг иккинчи ўрнини Луис Фонси ва Дэдди Янкининг Despacito қўшиғи забт этди.

Кейинги ўринлардан америкалик қўшиқчи Чарли Путнинг Attention ва Portugal. The Man гуруҳининг Feel It Still қўшиқлари ўрин олган. Американинг Imagine Dragons гуруҳининг иккита — Believer ва Thunder қўшиқлари рейтингга киритилди.

Рус тилида куйловчи хонандалар орасида Burito гуруҳининг «По волнам» («Тўлқинлар бўйлаб»), Украинанинг «Гриби» гуруҳининг «Тает лёд» («Муз эрийди»), Artik&Asti гуруҳининг «Неделими» («Ажралмаслар»), Светлана Лободанинг «Случайная» («Тасодифий») қўшиқлари энг кўп тингланган, деб топилди.

Рейтингни тузишда 2017 йилда чиққан қўшиқлар ва альбомлар ҳақидаги ҳамда январь ойидан ноябрь ойигача неча марта тингланганлиги ҳақидаги маълумотлар ҳисобга олинган. Бу вақт оралиғида сервиснинг ойлик фойдаланувчилари сони 20 миллиондан ошган.